Dear Daniel CH-3

 Siamtei chu a coffee no dawm chung chuan a phone a bih ngar a, chutih lai in u Mapuia pawhin min rawn thut hnaih ve bawk a ka lo tang leh tung tawh " A awm te chuan sawi tur che nia " zawi deuh tak hian a ti a, " Min zawt silo a " ka lo ti ve bawk, rum nghut in a nui suk a. " Thil hrilh che ka tum a, mahse nakinah a nimai " a ti leh a, eng tak chu ni ang maw?? Siamtei chuan thlah tur in a ti tlat bawk sia " Min lo nghak rawh " a tih leh hnu ah a chhuak zui a, a thil min hrilh tur chu eng nge a nih ang? tih vel lo ngaihtuah chung chuan ka lo nghak ran a, ka huphurh viau rual in ka hrechak em em tho bawk si.

Rei pawh a thang lo, kawngka bul a thawm a rawn awm rual in a rawn lut a, ka lo melh kiau. Ka bul a rawn thut thlak a rual a, rei deuh chu a ngawi leh tlat lawi a, a lam ka hawi chuan ngaihtuah muk tih hriat zet hian a hmel a lo thutak kher mai. " Ka duh che " ka rin loh lutuk a a thil sawi avang chuan han chhan mai dan tur pawh ka hre lo, " Tun ah tut tut chuan min chhang lo mah la, ka nghak thei ania. " keimah pawh chu min en chuang lo hian a ti leh a, " u Mapui.. " ka tih chuan min lo pawt chat in " Min duh loh thu sawi lo la, min duh let hun ka nghak thei " ka nui sak a, ka duh loh thu ka sawi a hlau em mawni?? 

" Chutiang pawh a nilo...min duh tak tak ami? " ka tih chuan a bu nghat a " Ka hmuh tirh atang che khan " ti in a hmui a pet zeuh a, min melh nghal ran bawk. Han chhan mai pawh chu ka duh a, a rintlak ang tih pawh ka ring, mahse a hma a ka lo tihsual tawh na khan hlauhthawnna min pe a, rilru pek loh tum pawh ni ila ka thei dawn lo tih ka hria, ka natna tur ka insiam leh mai mai ka hlau ani.

Kan ngawi dun ran a, inngaihtuah chian hmasak phawt chu tha in ka hria a, tin, hmeichhe easy tak nih ka duh lo bawk, ka duh ve tho tih chu ka pha lo mahse min duh thu a sawi rual a lo chhan nghal kha chu dik in ka hre tlat lo ani. A sana a bih zeuh a " Ka let a hun tawh anih hi " min melh zawk a, a din rual chuan keipawh ka tho ve vat. " A nih aw.. " Kawng ka a ding chung a ka tih chuan a rawn in her a, ka sam a rawn tuai zeuh, ka kut rawn la in engemaw hi a hmeh bel a " Ka rawn bia ang che " ti leh in a chhuak zui a, a liam hnu a ka han en chu chocolate a lo ni.

Ka hmai te phih a ka in tihfai leh hnu ah khum a bawk chung hian whatsapp status ka en kual mai mai a , u Mapuia chocolate min pek ka lukham bul a ka dah chu en in ka nui sak, ka mitthla ah a hmel a rawn lang a, mahni chuan lawm loh in ka nui ka nui mai. Message lo awm te chu ka en kual a Puia message chu reply lo in Siamtei zawk chu ka hawng a, " U Mapuia hian a star che in ka hria" ka nui hak a, hrilh ve law law chu tha a ka hriat avangin ka sawi fai ta leng a a lo phur khawp mai. A u chu a fak nghal luam a, a typing reng a, message ka dawng zawt zawt a ni ber. " Mahse, ka la chhang lo a " ka tih chuan " Aw, a tha enthlak rih deuh a ngai. A lan ang hi a lo ni lo thei " a ti leh ang lawi a, nichin a a fak nasat nen.

" Rinsangi tih dan tur pawh ka hrechhuak tawh, mahse tlem in nghak leh deuh ila, a theihnghilh leh tawh ngai lo tur in kan siam dawn nia " a tih chuan ka ner sawk. A va han tha lo leh dawn chiang tak...hetianga chet nghal mai a rawt lo a, nghah deuh a duh hi chuan thil tha lo ah pawh tha lo tak a ruahman tihna ania, buaina a kan luh leh vaih chuan pa Buata hmachhawn a huphurhawm leh dawn khawp mai. Chunglam khian min tanpui mawlh rawh se.

" A... i tih dan dan mahse amah  lo tur khan aw " emoji thinrim sen vek kha a rawn thawn let tuar a " Dawih viau zel suh " " Imm...i thu thu lawm " ka tih leh takah chuan lehkhabu a chhiar tur thu sawi in min mangtha a, u Mapuia message a rawn lut ve chiah bawk. " Ka thleng aw "  " Imm... i tlaivar dawn ami? "  ' Dawn ang.. i mut a chhuak tawh em "  " Chhuak ve deuh tho, hna kal ka ngai bawk sia " min lo be chiah a chutia ka lo chhang chu ka inthlahrung deuh " Um.. muhil rawh, i mumangah min hmu la " ka lai khawlo zo leh vek tawh, u mapuia hian hetiang tawngkam hi a hmang ve ang tih ka ringlo reng reng " Im..hmu ngei ngei ang, muttui aw "  " muttui le " Muah emoji kha a rawn thawn tel a, ka phone dah in thosilen en ngar chung chuan ka nui ver ver. Hetiang chuan ka mutthilh theih pawh ka ring lo e a.

Engtik ah nge chhanna ka pek ang a? Engtin nge ka sawi ang? tih vel ngaihtuah chung in a rei a rei ah chuan ka lo muhil ve leh mai bawk a, zing ka tho te chu mood a van fuh tak, u Mapuia morning wish lo awm vang chu chhang in ka tho chhuak a, chaw ka chhuan hnu ah inbual leh in, ka insiam zui nghal a, chaw ka ei laiin Siamtei a rawn thleng a, a rawn bar ve nghal mawlh mawlh. " Chanchin ka hre chak tawh lutuk a chaw ei lo in ka rawn kal " a tih chuan ka lo chek hlak a, em em thin hian. 

Chaw bar mawlh mawlh chung hian zawhna hrang hrang min zawt a, awmdan tur te chu min hrilh pah mawlh mawlh " Inngaihzawn lai a sex hman hi nakin hnu ah a pawi thin a, i in ven thiam a ngai ania, i hmangaih avang ringawt in i pasal a ni dawn lo, pasal te tan a inchhuanna tham kan nih theihna tha ber chu virgin hi ani " a tih chuan ka thiannu chu ka en vang vang a, naupangchhia thin hle mahse a hun ah hian chuan a puitling leh khap thin lawi a, ka tan hi chuan thian, unau, nu leh pa nih hi a kawp vek a, a hlutna hi engmah in a hen lo.

" Ka scooty ke a chhia a, taxi in ka rawn kal " a thleng chawi chung a a tih chuan " Vawiin chu kan hma tho a, ke in kal ila " ka lo ti let a, a bu nghat . Thleng te kan tih fel leh hnu ah kan chhuak chauh a, kan dawr kan tih mai thil kan lei na bik ah lut in ice cream kan lei a, kal pah a kan titi duh bawrh bawrh chu mi kan tawh te chuan min en duh riau in ka hria. 

Bike hnung a Rinsangi thawmhnaw thelep zet leh makeup chhah tawk in bel chung a lo hawi vah lam chu kawk in " sawpa saw Remruata a ni miahlo tiraw?? " ka ti a, a lo chek tlak tlak " Amah saw anih saw mi hur chu " ti hrep in a kal zui mawp mawp a, dawr kan thlen chuan u Sangtea pawh a lo la thleng lo. Midang ho chuan minlo melh ha ha hlawm a, nidang zawng a tlai ziah kha kan nia a mak ve bawk ang. 

Chhun thil kan ei laiin u Mapuia'n min rawn bia a, zan a a lo len tur thu a rawn sawi bawk a, zanah chuan a rawn leng ta ngei reng bawk a, mahse duty a ngaih avangin a leng rei lo thung. Nitin chuan u Mapuia nen kan inkar chu ka ngaihtuah ve reng, ka hlauhthawnna in min kian san lo chung hian ani nen a inzawmna siam chu ka duh a, puitlin tur a ka rilru ka siam veleh ka hun kal tawh in min man thar leh thin. Khatiang khawp a na tuar leh kha ka zuam lo a, ka tawrhchhuah leh theih hi ka ring lo. 

" Hetiang ringawt hian i nung thei dawn lo, hun kal tawh i in man beh tir chhung chuan hma i sawn thei lovang. Huaisen tak a i hmachhawn loh chuan i tan na ngaiah hian i tang kumkhua mai dawn asin " tia Siamtei thusawi chu ka ngaihtuah chiang a, ka rilru ka siam fel, ni e, ka tawrh a ngai a nih leh ka tuar mai a niang chu.

 

Ni thum a liam leh a,  u Mapuia'n lo len tur thu a sawi chuan " Zanah chhanna ka pe ang che " tih hi ka thawn a, " Yes, mahse min hnawl loh ka beisei " a rawn ti let ve a. Ka biak dan ah pawh hian chhanna pe kher lo pawh in hriatthiam na tha a ni ve asin mawle...

Zantir atangin ka thusawi vel tur  te chu ka ngaihtuah lawk nasa mai, ka rawn ber Siamtei lah chuan " Ka duh ve tho che " ti tawp rawh a ti mai sia, mahse chuti teh tawp lo deuh chu ka duh ve khanglang bawk nen rilru a va buai tak. U Mapuia rawn thlen atanga rei fe a liam hnu pawh chuan ka sawi tur chu ka la sawi mai thei lo, engtia han tih chi nge mawni? Min duh thu a sawi lai a ka lo chhang mai lo kha ka inchhir rum rum tawh.

Eng eng emaw sawiin kan titi dun ve reng a " u Mapui... " ka ti hluai chu min lo melh ran a, ka thulh chawpchilh nghal, hetiang chuan ka sawi thei hauh lo ang " i chhanna chu ka nghak ania " chimawm zet a a mit ko san in a nui deuh a, ka hah lutuk chu ka luak a chhuak hlui tawh. " I hrethiam reng " ka tih chuan " I sawi ngei kha ka hre duh alawm " a lo ti tlat. " Aw, anih leh ka duh ve tho che a, kan inngaizawng mai dawn nia " ka ti pawrh a, a nui huk chu melh hrep in ka mal ka sik ngar ngar. 

" Ni e, inngaizawng mai ang " ti in a nui suk suk a, ka dar ah a rawn kuah a a dar ngheng tur in min pawt hnai deuh bawk a, a haw dawn ah a vawikhat nan min fawp zeuh bawk a, ka chhungril ah hian min zem chial chial a, awm a ti nuam veng veng mai. Ka intih fai zawh a ka mut meuh chuan a message a lo awm leh vang tawh a " Thleng chiah aw..Duati " ka nui tawp " Awle... 

Siamtei call ka pick up rual rual in " Rawn hawng vat teh " a rawn ti nghal tawng a, hmanhmawh deuh in ka tho a kawngka ka va hawn chuan " Enge i rawn tih dawn " ka ti hu a " Ka rawn chhuak ru, insiam rawh "   " Maw?? Khawnge kan kal dawn a? "    " Lalrinsangi te inah " ka hrethiam lo hmel lutuk a hmuh chuan heti hian a sawi a " Kha hmelchhenu kha Tenawma nen khan an lo inthen daih alawm, a zan leng haw kan lo chang dawn nia, hmanhmawh la insiam vat teh " min tur sek sek a, keipawh hmanhmawh zet in ka insiam a.

Ka insiam lai te chuan tu emaw hi call in a phun leh bal bal thin a, ka va chhuah phei lai chuan " Aw.. kan rawn kal dawn i lo dah maw ?? " ti in a vei tawn sek a, chutah " kan rawn thleng har lo ang " ti in phone a dah a, eng thil nge maw a ngaihtuah leh tawh ni? ka lam rawn hawi in kan in zui chhuak nghal deuh mai bawk. 

" Khawnge kan kal dawn? Enge kan tih dawn a ? " zawhna ka zawt mawlh mawlh a " Nuam i ti viau ang " tih zawng in min chhang a, ka hre chak lutuk chu ka za sek tawh. Kawng chhuk zet a kan tlan hnu ah in pakhat kawt ah hian scooty a ti ding a, inchhung a Siamtei lut chu ka zui nghal vat. Nu, tar deuh lam tawh tv en a lo thu chuan " Bathroom ah a awm kha, ka kal mai ru " a lo tih chuan bangbo fe hian Siamtei chu ka zui ve zel a " I la zo nange? " Siamtei'n a tih chuan " Zo a nimai " pakhat chuan a lo ti ve thung. Bathroom chhung ka lut chu thisen rim a nam huk a ka inring hman lo chu ka uak nghal that a, ka hmui ka hup nghal chat in ka tlan chhuak rang hle..

" Kha, engatan em em nge maw i tih le " chupa chuan ti in hriatthiam loh hmel fe hian a meng kal ralh a, bucket te chhe lo tak chhung a thisen lo khat deuh pam chu melh kawk in Siamtei leh chupa chu ka melh tawn chhen a, nui var var chung hian Siamtei chuan a lo ban vat a, chu pa zawhna chu a chhang lem lo.

Scooty a a lawn tur chu pawt ding in " Heng hi engatan nge i tih a? " ka ti ta nge nge a, " Rinsangi kan leih na tur "   " Maw??? " ka aw ki chu a ring viau, a lu a lo bu leh nghat a " Vawk thi a inbual chu nuam a ti ngawt ang " tiin a nui zui var var a, keipawh ka nui hak a, Rinsangi hmel awmdan tur te ngaihtuah in ka nuih a za tlat. Higher kan kal lai atang tawh a in ngeih lo kan nia,Siamtei nen chauh kan ni chung pawh a an thian ho in min ngam tak tak ngai loh lai te ka mitthla ah an rawn lang a, ka phur thar riau mai lehnghal. 

Rinsangi te in panna step bul a theihai kung sang lutuk lo, buk tha zet si ah chuan thu in a leng haw hun chu kan nghak dun ran a, kan thlen hi chuan dar 11 a pel dawrh tawh a, dar khat dawn ah [pawh a la rawn haw lo chuan " A leng lo em mawni aw ?? " tih ngaihtuahna min put tir tawh. Siamtei bul a ka sawi lah chuan " A la haw lo, a lo thleng tep ang " a lo ti tlat a, keichuan a riak chhuak dawn ah ka ngai hmin hmiah tawh thung. Mahse, step zawn a bike rawn ding chat leh hmeichhe chhuk ka hmuh chuan ka kiai sak a, Siamtei ka kheuh nghal zeuh bawk.

Kan mi nghah ngei chu ruih hmel zet hian a rawn chhuk a, rah sual hlau tih hriat zet hian a rawn kal zel a, kan zawn a rawn thlen chuan a hah ngang aniang a thu hnawk a, a phone phawrh in tu emaw hi call in a bia a, an in be rei hrep lehnghal. Phone a dah rual chiah in bucket chhinna ka hawng a, Siamtei'n a lo theh nghal bawk. Rinsangi rak tuar leh uak thawt chu en in nui awr awr chung hian kan zuangthla a, ka tlan tawh chu hawi let in Siamtei a zuanthlak na lai a a lo la thu reng ka hmuh chuan ka pan pheileh rih a, " Ka tho thei lo... " a lo ti tham tiak a, kaih thawh mai ka han tum chu a thu leh hnawk a, chutih lai in Rinsangi lah chu a rak tuar tuar mai bawk si. Midang an rawn thlen hman chuan buaina ah kan lut leh dawn chiang si,Rilru a va han hah tak...

" I thawh loh chuan min rawn man dawn ania " thawmdim zet in ka ti sa sa a, chutih lai in a hma lawk a sarak chiam chiam Rinsangi kha a lo ngawi daih tawh tih ka hrechhuak zawk a, hnar tum dat thawm ka hriat na lam ka hawi chu le.. street light in a chhun tawk vel a Rinsangi thisen in a bual huh zuih leh, a sam sei zet kar atang a rum zet a min lo melh ka hmu chu ka te chhuak thawt a, Siamtei pawh chuti tho. " Tunge?? " Patling aw pawr huar mai ka hriat rual in hlauhthawnna in ka khat a, Lalrinsangi lah chuan min lo melh reg bawk si, a lan dan rapawm lutuk avang chuan ka hmulthi te hi an ding ur ur thei nia mawle.

" Pa...hetah " ka hmanhmawh tawh lutuk chuan Siamtei chu ka pawt sawk sawk tawh. Rinsangi pa, kan headmaster ni thin Sir Chhuana thawm ka hriat chuan hnuai lam bih in " Van pawi tak " ka ti chhuak hap a, Rinsangi tap tha leh bawk nen Siamtei ke na bawk, kan buai nuaih a ni ber e. " Khai aw... " a chek hluk a, ka lo melh kar lai in light a rawn eng pup a, ka chhing nghal sawk mai. " Nangni pahnih bawk chuh... " hahthlak tih hmel fe a thawk la hawk ri in a zui a, " Hello, sir " nuih tlawn deuh ti tih a ka lo tih lai in a kut a vai thuak a, " Eng chu in hria  ni maw heti em em a buaina min siam ni? " ti in min melh vang vang a " Lalnunsiam, enge khatah khan i tih reng ? " khauh fe hian a a ti leh hrawk a " Ka ke a na a nih hi " Siamtei'n vin zet in a lo ti let a, chutah ka lam rawn hawi leh in engmah sawi lo hian phone a phawrh a, a tawng zawng pawh chuan a thinrim hle tih a hai theih loh. 

Police a bia tih ka hriat chuan Siamtei ka en vat a, ka hlauhthawn em em lai in a hmel ah chuan engmah a lang ve hauh lo, chutah " a hma ang kha a nimai " zawi te hian a ti hap a, hrethiam zet in ka lu ka bu nghat. Police lo thlen hma chuan min hau a, a chang leh min zilh bawk a, kan lu chung ah kut nghat in min tawngtai sak bawk. Sir Chhuana hi pa fel leh zaidam tak a ni a, a fanu nen erawh lei leh van ang hlauh an ni thung. Lalrinsangi ka chunga a chet dan sawi ka tum lai mek in police an rawn thleng a, police station a min phurh chhoh lai te chuan kan in sawi fihlim dan tur hlir ngaihtuah in rilru a buai hle ringawt.

Police officer chum deuh mai hma ah chuan kan thu dun ran a " Nangni pahnih bawk chu..in hmuh loh na a va rei ta ve " a kiai suk a, ka lo melh ralh lai in "In mawl ami" vin zet hian a ti a "Mawl vak nang" ka lo tih chuan min melh khui khui a, a lawm lo hle tih a mitmeng rum zet chuan a ti chiang viau... "Engvangin nge mi thisen a in leih a...tu thisen nge" a tih leh rual in  " Vawk pui " a zawhna ki ang chiah a Siamtei'n a lo tih hmuk chuan lo awm ve ho chu an nui hak a. Officer pawh chu a hawi deuh lawl lawl nimai in ka hria.

Siamtei thutna siam rem sat sat lam ka hawi rual chuan a hma a mi chu a lo melh kar a, chutah " Enteh maw Officer ka hrilh ang che pawi sawi lo min man a nih hi, thil sual ti tu zawk man ta che...Khanu kha ka thiannu inah hian rawn kal in a pasal nen inngaizawng ah a rawn puh a chu mai pawh a la ni lo.. a inchhung ah ngei kut a rawn thlak a nih kha.Hei en rawh a sam te hi a pawt kawlh tep alawm.."  " A dik chiah hei en mah rawh " ti in a lam a kun hnaih pah chuan ka chhip chu ka keu sawt sawt a "A pasal pawn a á a tih kha...a phu tawk hremna na lo ber kan pe anih kha ti khan a inbual a inbual ang a a reh ve mai ang.In duh leh amah kha va man zawk ru.. Sir keini chuan Sualna kan neilo" ka tih ve tak ah chuan mak tih hmel zet a min en tawn zak zak in a thaw hawlh a, kan tawngthei zawt zawt em bawk ani.

" Chu pawh ni se, thisen a in leih kher tur a nilo, buaina hi in siam reng mai hahthlak dun lutuk " Rinsangi pa in a rawn tih chuan

"Nangchu lo ngawi la" Siamtei'n a lo ti let zat a, sir chhuana phawk zet a ding reng chu melh zawk in a bul a Rinsangi victim rolr lo play leh mek tawh chu ka ner khum sawk a, a lo inbual tawh a nih hmel.

Room a awm leh kan tawng hre pha ho chu an khi tha hlawm a,keini pahnih erawh kan nui ve duh thak lo.Kan tih than hrim hrim ania hengte chu kan kutzungte awmna kan bel tluk zet in man chhuah nih a awm dan tur te chu kan bel tawh. " A hma ang kha ani mai " Siamtei'n a tih khan " Zam hauh lo tur " tihna a ni.

" Kan tawr tur ang chu kan tuar mai ang , mahse Hetiang hi thil kal dan a nih tak ah chuan sir, keipawn report theh luh ve ka duh a lalrinsangin a pasal nen inngaizawng a min puh na leh ka inchhung a kut min rawn thlak na te kha case file ve nghal law law ka duh " amah Rinsangi en kar chung a ka tih chuan a hmel a chiai na lo lang ka hmu chiang hle. " Thu hretu pawh kan nei nual ania, hremna na lo thei ang ber kan ngaihtuah sak lai a heti zawng a an tih duh tlat leh buai ila a nimai " Siamtei'n a lo tih ve leh tak ah chuan a kut a khur tan der a, chalak fahran a ka nuih lai in a meng pha dui tawh.

" In chhungte call phawt mai teh u " officer in a tih chuan " Chhunge ka nei ve lo " ka ti dek dek a " Aw, ka hria i duh duh call rawh, puitling " vin zet in a ti leh hluk a, ka ngaihtuah a u Sangtea chu Siamtei'n a call ngei dawn sia, midang call tur nei hek lo u Sangtea bawk chu hreh zet in ka call ta ringawt a.