Dear Daniel CH-4

 "Hello.." lehlam ami in mutchhuak aw deuh a a rawn tih chuan "U Sangte buaina kan tawk a police station ah lo kal rawh aw" ka ti a, ka inthiamlo bawk si chu ka hrehawm tun mai " Siami'n a rawn sawi alawm ka rawn kal dawn " a ti leh nghut a "Ka lo thleng nghal ani mai" ti leh in a off a, pawi ka ti lutuk chu sawi ngaihna pawh ka hre lo.

Pawn lamah motor thawm a rawn awm a, a hnu rei vak lo ah u Sangtea a lo thleng a,u Mapuia a rawn lang zui veleh nghal. U Mapuia ka hmu chu ka awm chhung ami chuan min sawh chhuah san a tum ta mai em maw tih mai tur hian rang zaih zaih tak ani. Station chhung an rawn luh chuan an hawi kual deuh a chutah in kheuh zeuh in kan lam an rawn pan a, ka lo kun nghal chal thung. officer thinchhe deuh khan a lo chibai a a lo be tha khawp mai. An in biak vel dan atang chuan u Sangtea leh u Mapuia te nen chuan an in hriat that hmel khawp hian ka lo hria a.

Keichu ka hawichhuak ngam tawh der lo a, ka inchhir ngawih ngawih hi a ni tawp. " Engvang a buaina hi tlansan thei miah lo nge maw ka nih thin le??? Siamtei kha engvang a lo dang lo nge ka nih ?? " tih te chuan ka inngaihtuah leh hnuhnawh a, a sawt lo kher lehnghal. Hetiang dinhmun a ka mipa duh ruk deuh in min rawn hmu kher hi chu a zahthlak ve bawk em ani. 

Ti ru deuh tak chung chuan u Mapuia chu ka han melh hram a, ani pawh in minlo melh ve run ka hmuh chuan rang zet in ka mit ka la sawn vat a, hnuailam ka bih leh nghal zat. Ka awmna atang a a dinna chu a hla vak loh avangin  a nui suk ri chu ka hre thei a, chung te hlei hlei chuan awm an ti nuam lo zual nimai in ka hria.

Officer chuan thil thlen dan te a han sawi a, kan thusawi a sawichhawn leh lai chuan siamtei'n a sawi dik loh lai a lo siam that sak thin a, keichu hawi pawh ka hawichhuak ngam tawh lo "I hmui kha ka chilh phui i duh loh chuan ngawi hmak ang che " a ti khur khur a, ka thiannu kawlhrawng lutuk chuan buaina min belhchhah mai hlau in a nak a ka han sih vak takah chuan phu zuk in a la au vak zui a, a ti zahthlak tak tak ani.

Sir Chhuana leh u Mapuia te pathum inbia chu ka thlek zeuh zeuh a, ka inthlahrung bawk si, zak bawk si chu ka tah te a chhuak, U Mapuia kher kher a rawn kal tel vei rawl nen khuk chem chem a ral daih mai ka nap ani.  " Ti hian inrem mai ang u, Ruatruati pawn case chu a file lo ang a, Rinsangi pawh buaina siam zawng in khawsa tawh lo se la " u Sangtea'n a ti ta nge nge a, diktak chuan case file kha ka tum hran lo a, kan fihlim theih phah tak in ti a sawichhuak mai chauh ka ni. Case file chu sawi loh, khatiang thuar tham a  in ham buai vel kha ka peihlo hrim hrim.

 Bon min sign tir in pawisa erawh kan chawi lo thung a, u Sangtea hmelhriat ngah zar kan zo ka ti lo thei lo. Chhuah tum a Rinsangi leh a pa lo ding kal pel pah chuan "Awi..Rinsang i perfume chu sangha atanga siam a ni maw?? " Siamtei'n a ti zui leh hram a, u Sangtea meng rum lutuk chu hmu ve awm pawn a awm duh leh tawh map lo thung.

U Sangtea Bolero ah chuan kan lut dial a,mipa pahnih a hma ah an thu a,keini thiandun a hnungah kan thu thung. U Sangtea ngawi reng chuan awm a ti nuam thei hauh lo Police te nen a an inbiak kha a tawng hnuhnun ber a la ni rih a, u Mapuia lah chu tawng tum hmel pawn ka hmu chiah bawk silo, rilru ipik tun chung chuan ngawi rengin ka thu chawrh chawrh mai ani. Hetia ngawi reng lo hian min hau tal se chu a zia deuh tur.

Ka thiannu lam ah chuan tawlh hnai in "Enteh officer kha a lo la chum reng...a dum bawk sia" ka ti chu a lu a lo bu nghat a "Alu ur hmin a ang" a rawn ti khauh a ka inring hmanlo chu ka phuh thawt a, Siamtei nui awr awr in a hmel awmdan leh a tawng dan te a zir kual leh vel bawk nen pum na vek khawp in ka  nui a, a hma a thu te pawh chu an insum viau na in an nui ve tho tih ka hriat chuan awm a nuam huai huai mai.

"Hemi te pahnih vang hian thlamuang pawn ka awm thei tawhlo,vengchhung a buaina an siam loh leh mi tu emaw thil an tih chhiat sak a,tlangval hawk lak ang mai in khawlai ah an in sual thul...Han hau ila,hnial khan an hre si,an tang rual vei tlat reuh a,en mai hi chuan tu pawi mah sawi ngailo hmel an pu a,an khawsak duh dan lah hi a bai dai baw zawng hlirrr" ti chung chuan a nui hawk a,u Mapuia pawh a nui ve huk huk tho chuan ka hria.

"Tumah kan ti buai hmasa ngailo " ka lo ti hmuk chu hahthlak tih hmel fe a thaw hawk in u Mapuia nen chuan thil dang sawi chuan an in be daih a, tukverh ah chuan dak in ka hun hman te ka ngaihtuah kir a, u Mapuia'n a lo hre ve te chu pawi ti in zak hle mah ila, Rinsangi lak a kan chet danah chuan inchhirna emaw inthiam lohna ka nei hauh lo.

Zing lam dar hnih velah ka in kan thleng a, Siamtei'n riah tum nasa teh mah se u Sangtea'n a remti lo a,kan mark a chhe laklawh nen haw tur in ka ti ta ringawt a, tum bar bar chung in a haw ta nge nge a, u Mapuia'n min be lo leh a tawng tha duh miah lo erawh in awm a ti nuam miah lo. 

 

 

An chhuah dawn ah lah a rawn hawi let miah lo a, a hmel thutak leh a mitmeng lawm lo tih hriat zet te chu mitthla ah a cham a, engemaw hian chhungril atangin min tur et et bawk, an haw atang pawh in minute 20 a liam tawh a,in an thlen tawh ka ring Siamtei te in leh ka in hi in hlat lutuk a nilo a, minute 5 tlan bak a nilo. Min rawn biak hun nghak in khum ah chuan ka mu meng kar reng a, biak ka duh a biak tum in phone ka han lek chhuak a, ka han call dawn tak tak lah in ka ngam chiah bawk silo. " Ka chungah a thinrim em mawnle?? " ka phone chu en in ka phun chhuak sep sepa, ka rilru chu a nuam lo tawh takzet.

Englai in nge ka lo muthilh pawh ka hrelo, ka harh chuan kan kawmthlang a Workshop pawh an lo ri leh chuah chuah tawh a, sana ka en chuan dar 11 a lo ri tawh chu ni in, hmanhmawh zet a ka phone la a ka hmeh en chuan ka hnual rawih mai. A message a awm ring a ka phur hman tehlul nen chutiang engmah a lo awm lo leh a last seen lah minute khat liam ta mai a ni chung a min be silo te chuan ngaihtuahna tha lo pui pui min put tir lo thei lo a, phur lo zet a tho chhuak in run dal ah tak tak chaw pawh tlem chu ka ei ve hram.

" Ka tlai laklawh tawh tho a kallo mai ang "ti in inchhung te chu ka ti fai ta mai mai a, dar 12 vel ah Siamtei'n min rawn call a, clinic a kal pui turin min rawn sawm a, a ke chu a na a tih deuh avang leh a vun nasat thu te a sawi chuan ka kal pui tur thu a chhang in ka insiam nghal mawlh mawlh a, reilote ah a rawn thleng ve mai bawk, rei awmlo in clinic lam pan in taxi chuan kan kal a, a na ve hle aniang rah pawh a rap tha ngam mang tlat lo.

Clinic kan va thlen chuan mi an lo tam reuh phian a, a hnunglam kan ni bawk nen kan nghak rei ngat ngat khawp mai, Siamtei phei chu phone en in a phun a phun tawh a, a luh hnu rei vak lo a a rawn chhuak leh chuan xray leh eng eng emaw tih a ngaih thu a sawi a, test ngai ang ang kan tih zawh chuan khua pawh a thim dawn tawh. Vanneih thlak tak in a lo serious lo hlauh a, ka thaw huai mai. diktak chuan keimah vang a ni deuh bawk nen inthlahrun a na duh riau a, ka ril a tam tawh em em bawk nen kan haw thei ta chu ka lawm khawp mai.

Kawngka kan pel awrh tih ah Khua chu han dur lawk emaw pawh awm miah lo in ruah a rawn sur thut a, clinic chhung a luh leh mai kan han tum chu an lo khat vek tawh bawk si, tih ngaihna lo zet a ka hawi ruai laiin " Mami, hetah lo kal ru " ti a putar pakhat minlo kohna lam pan chuan kan tlan phei a, ruah a tam bawk nen ka kawr te chu a huh zawr hman vek tho.  

Zawm tur

Putar dawr chu kuhva rah leh panhnah zawrhna dawr a ni a, a rimtui fahran lo hle na in kan tawm hulna neih chhun a ni rih bawk nen a tawrh theih viau tho. Thutna tur min rawn pek ah chuan thu in, thli in kan thawmhnaw huh chhan a min rawn chhem chuan vawt tih vang in khabe a in kkhawng leh dat dat thin. Ruah lah chu ban a hnek in a sur hnem tawlh tawlh em maw tih tur hian a buak in a baw hawk hawk a ni ber e.  

Siamtei pawh chuan " A vawt e... ka ke hi a na tawh lutuk " a ti deuh sek tawh a, Chhum a zing chuai a, taxi han phar mai tur lah a vang nasa si. Tihngaihna dang hre hek lo a ke chu ka mal a dah in ka han nuai lum sak nawk nawk a, a dam phah sawt erawh ka ring chuang lo. Mahse tun atan a ka tih theih awmchhun a ni rih miau sii. A pang a sa vur a, a khur nasa em em bawk, pa Buata leh u Sangtea kan call lah in an la thei der lo a, rilru a tawt duh kher mai.

Siamtei ke hmet a ka kun chal lai chuan ka bul a rawng ding an awm tih ka hria, ka rim hriat avang chuan ka hawi chhuak zawk a, u Mapuia mitmeng dam ruih leh lo nui suk ka hmuh chuan ka thaw deuh huai in ka hria, " Siamtei hi a khua a sik " ka ti nghal tawng a, rawn thu hniam ve in Siamtei pang a han deh ve chuan...A kut a  a nihliap ken chu lek kang in " Lo kal ru " ti in Siamtei nen min hui hnai dun thuai a, Siamtei ban lehlam ah chuan a lo dawm ve vat bawk. A motor dahna kan thlen chuan kawngka hawng in driver seat lam a pan a, motor chhung lum uap deuh churh ka ngainat ber tum a ni hial ang. Ka bul a thu ka han melh chu ka tum loh lutuk anih vang nge ka phu deuh zawk mai. A mitmeng thip zet leh rum deuh ul te chu a nelawm loh nghal em em tawp a, a hmui leh khabe hmul tuak tawh lam atang chuan kum 60 bawr vel chu a ni tawh in ka ring. Chutah a mit ti zim deuh san chung hian min en reng a, min lo melh reng na chu chu rei ka melh ngam miah lo. Ka sawi thiam miah loh hian chhung lam atang in min tur leh et et tawh a, a chhan lah chu ka hre hauh lo. Ka zam chhia va ani.

U Mapuia rawn thu lut chuan deskboard a hawng rawk rawk a damdawi mum leh tui min rawn pek chu lo la vat in Siamtei chu ka ei tir nghal vat a, kan tlan chhuah thleng pawh chuan tumah kan in be lo.

" Pa Zual in lo kal elaw?? " Siamtei'n a tih chuan " Kal a nih hi " a lo ti hmuk a, a hmel pawh a nelawm loh tawh sa nen, a tawng phei chuan a ngainatawm lo lehzual. " Engtik nge in haw leh dawn? " ti tu chu Siamtei bawk ani " Naktuk tuk leh ah " pa Zuala a tih chuan a lo ti leh mai a, a aw lah chu a thum bul mai bawk sia... " Ánî a lo kal ve lo ami? " Siamtei'n a ti leh chiah chu rang lutuk in a lam ka hawi a, ka bul a thu mek hi u Mapuia pa tihna maw??.

" Kal lo, hna thil ah ka rawn kal " a phone bih ngur chung chuan a ti leh a chutih lai in a hma seat a thu chuan" keichu hotel ah ka tlang mai ang aw " aw no nalh zet in a rawn ti ve chiah bawk a, kan luh dawn khan ruah sur avang in ka lo ngaihtuah lo mai mai a, a hma ah chuan thu an lo awm reng tih ka hre ve chiah.

U Mapuia lam chu zawhna mitmeng nen ka hawi phei vat a a ni erawh a motor khalh lai ah chauh rilru a pe emaw tih mai tur hian hma lam a en ngur a, an thusawi te chu hre awm pawn a lang in ka hre lo. 

" Aw... Sangtea te inah chuan rawn innghat ve mai la.. Hmun dang dang a thlen chu a buaithlak mai mai alawm, inthlahrunna tur a awm chuang reng reng hleinem " ka bul ami chuan a lo ti var a, Siamtei a chhan dan leh chu nu a biak dan chu dang tak ani. 

" Hotel ah chuan kan thlah ang che " u Mapuia'n a lo ti ve thung a, chunu in u Mapuia lam hawi a thawk a la hak leh hnual rawih hmel pu zet a a melh chu ka thutna atang chuan ka hmu thei a, rinhlelhna rawn lut chawp chilh in ka awm chu a nuam tawh miah lo. Eng a mah hma in ka hma seat a hmeichhe thu chu ka thik em em ringawt tawh.

 

 

 

 

Motor a din rual in Pa Zuala leh chu nu chu an chhuk vat a, u Mapuia erawh ngawi reng in a thutna ngai ah a la thu reng a, han biak mai tum a ka ka an zuau lai in " Daniel, ka luggage hi minlo ken sak mai teh " rawn ti tu avang chuan ka tawng tum pawh ka thulh chawp chilh nghal. a chhanna nghak in u Mapuia chu ka melh kal a, chutah " Thianpa, hei lo pui lawk mai teh u " ti in security te chu a au a, ka lo nui ru sak thung. 

" Aw... rawn tih pui ve mai la, a harsat viau loh hi " lungawi lo aw zet a pa Zuala'n a tih chu a hrelo der hmak ni mai in ka hria. Pa Zuala lah chu a rawn lut lawk lo a Siamtei nen chuan kan in melh kan in melh ringawt.

" I ril a tam tawh em? " rawn in her zeuh pah a a tih chuan ka lo melh ngar thung a, chhan tumna ka neilo a ka chak lo bawk. Ka thinrimna chuan min hneh lutuk a, ka thikna in a  pawlh bawk nen ka kâ hi ka an vaih chuan ka tap thei mai ang. Mi thenkhat ang a thinrimna sawi chhuak a, an pui chiam chi ka ni ve lo a, ka sawichhuak thiam lo a mi chiah pawn ka hre lo, sawi ber tur ka hrelo zawk ni in ka hria.

" A tam tawh ang, chhun a thil kan ei bak engmah a  la ei lo " Siamtei zawk in a lo chhan tak ah chuan " I hrisel loh tehlul nen thil ei that tur alawm " ti in a ipte a zen rak rak a, chutah thil mum sarang a fun hi rawn phawrh in " Tam chu a hnem ang " tih pah hian min rawn pe a, Siamtei chuan lo ban in a kheh rawk rawk a, a lai ah phel in a lehlam chu a hmawm zui hmak a, keipawh ka riltam ve tawh bawk nen ka thinrimna dahtha in ka ei ve ta tho.

Pa Zuala rawn lut in a thut fel rual chuan u Mapuia chu a tlan chhuak a, Siamtei te in kan thlen chuan dar 7 a ri der tawh. " u Mapui Ruatruati hi va thlah lawk la.. " Siamtei'n a chhuk dawn ah a ti leh a, chutih lai in pa Zuala pawh chu a chhuak ve nghal mai bawk a. A chhuak chiah chu ka thawveng sawt in ka hria,thawk ka la ham ham mai.

Inchhung an luh thleng pawh chuan a la tlan chhuak mai lo " A hma ah hian lo thu rawh " dam dup a a tih chuan " ka hmanhmawh deuh tawh a, min thlah vat zawk la " ka lo ti let thung. Nizan atangin min biak hun ka nghak a message pawh ka thawn ngei a, min biak chu sawi loh reply pawh min reply duhlo a, a thu thu a awm chu ka tlawm la ve tlat ani.

" I thinrim ami? " a tih leh chuan chhang lo in ka phone ka bih san hmak a, khawih ber tur pawh hrelo chuan zahzel ah ka thai kual ka thai kual ringawt  " Ka bia che ania " a tih leh pawh chu ka chhang chuang lo. " Duati .. " ka hnar tum dat in ngeiawm fe hian ka  nui lui hak a, nin hmel fe in a lo thaw hawk thung rei fe hnu ah pawh tlan chhuah a tum tak siloh ah chuan " Ka haw duh ania " ka ti chang fak a, hahthlak tih hmel fe a thaw hluai in a hmai a tuai pawk a, motor ti nung in a tlanchhuak zui ve mai bawk.

Nileng mai a ka message seen si min biak miah si loh ringawt chuan ka rilru a luah a, ka thinrim tulh tulh mai ani, " Enge i thinrim chhan ni a?? "  " Ka thinrim lo "  " Anih enge hetiang hian i awm? " a hmuh loh lamah ngeiawm zet in ka meng kual ralh a " engtin mah ka awm lo " ka tih chuan a lo rum hawk mai.

ka in kawt a a din rual chuan " I buai tehreng nen min thlah a Ka lawm lutuk " ti liam puat in ka chhuk nghal vat a, min koh na te chu hrelo der hmak in ka kal nghal nal nal. Chak fe a motor tlan chu melh in ka din leh ren rawn a, ka thinrim tulh tulh mai. Ka thinrim anih chuan ka sawi kher ngailo a ka thinrim chhan tur awm ang ngaihtuah nachang a hriat ve mai ka beisei kha ania... Min thlem bakah a in sawifiahna te pawh ka phut ve bawk.. Chu a hnek in a la thinrim let zawk em mawni?? 

Khum ah chuan mu in min rawn biak hun chu ka la nghak ta fan tho a, dar 9 a pelh hnu pawh in min la be lo a, a reh veng veng mai ani. Siamtei nen call in kan inbe reng a, u Mapuia pa chu pa khirh leh chapo ve tak, luhlul zet a nih thu te a sawi bawrh bawrh a, a sawi danah a ngainat loh hmel khawp mai. Champhai pa hausa ber te zing ami anih thu leh pa Zuala chu sawrkar dept pakhat a thu ve tawk tak chin a nih thu te a sawi lehzel a.

"Tlai a chuang ve kha Sarah-i a nih kha, u Mapuia ex " a ti chiah chu ka phu deuh zawk a " A ni maw?? " tih zawng a chhang in ka hmui hnuai lam ka seh neuh neuh a, eng nge ka ngaihtuah ber pawh ka hre lo. " I rilru ti hah duh suh, u Mapuia hiaan an duh tawh lo " a tih leh pawh chuan min va han chhawk lo chiang tak. " Eng ah mah ka ngailo... " ka ti tak na in engahmah ka ngaih zia chu ka hrechiang hle thung.

" U SAngtea'n a nasa lutuk, Mapuia hi a zar buai reng mai ani ati " ka thinlung a thikna chu turu tak a ni tawh a, lanchhuah tir erawh ka tum miah lo thung. KAwngka an rawn kik takah chuan kan inbiakna ti tawp in ka chhuak phei a, kawngka ka hawn rual a ka mi hmuh avang chuan ka phu deuh zawk. Khar leh nghal mai tum a chet ka lak lai in na zet a a phih let hrawkna avangchuan ka pai deuh chawn lehnghal a, U Mapuia chu rum fe a min en run chung hian a lo ding ngawi reng a " Enge i lo tih dawn? " a nui suk chu ka melh rum kher mai. Ngawi reng a rei fe min en hnu ah ka dar tawn tawn ah dawm in a rawn kun hniam deuh a, " Ka lo lut phawt ang aw " a hmel lan dan nen inrem lo zet a dam dup hian a ti a, inchhungah a rawn pen lut chawpchilh nghal mai bawk, thutthleng ah chuan chauh hmel zet hian a thu thla nghal dawt a, chutah

" Duati, keichu mipa zei tak ka ni lo,hmeichhe thlem tih vel hi ka thiam zawng a ni ve lo a " ka lo en reng a, chutah ka lam rawn hawi in " I lungawi loh chhan hi sawi la, ka theih phawt chuan ka siam tha leh vek ang " a ti leh a, ka lo chek tlak ringawt. " Kan inkar hi ka la thutak a, hetiang a chhan awm lo a tih tauh ringawt te  hi ka duh lo " a ti leh charh charh a, a thusawi chuan min ti thinrim tun ringawt. Chhang lo chuan ka ngawi reng, han sawi tlang dawt lah chu ka hreh ve angreng tho bawk si.  

" Zankhua in min be lo a, ka message i seen reng a, nileng in min be lo bawk a, chubakah hmeichhia i lo la phur zui, chupawh i bialnu hlui lehnghal " a tawp a tawp ah chuan ka ti ta nge nge a, mak tih hmel zet a min melh lai in keipawn ka lo melh let ve kar tho. " Nizanah khan ruang an chhar a, posmortem ngai a nia, vawiin kha mi ka zai ni a ni bawk a " sawi tur pawh min ti hrelo zo, ka inthiam lo deuh ani. Phone a khawih tam loh zia chu ka hre tho a, mahse a buai viau a nih pawh in message tawi te in thawn a harsat loh zia ka hrechiang " Message rawn thawn chhung lek pawh hunawl i neilo amaw? " ka nui hak a, ka ngeiawm viau in ka ring " Aw " a ti nghut a chutah amah bawk chuan " Nileng in engmah ka la ei lo, ka inbual a ka rawn kal nghal " a tawng chhung zawng chuan ka lo en reng a, a mitmeng dul raih a min rawn en let ve chuan keimah ah inthiam loh na a rawn awm a, ka lainat riau bawk. " Chuan i bialnu kha? " ka ti leh sep chu " Nangmah " a lo ti nghut a, a aw a lungawi lohna lang chu hai theih a nilo.

" Ka hre vek tawh " ka ti leh tawng a, thawk hluai pah in a lu a tuai vut a " An rawn kal tih pawh ka hrelo, ka room ah an lo awm a " thutthleng hnung hlam duai pah hian a ti a, " I thik maw? " ka lam a rawn thlek buk pah a nuihzat hmel zet a a tih chuan ka hawi sawn rang kher mai, Engvang in nge maw ka thik loh tehlul ang, Ka bialpa hlui in min phur ve se a thik lo thei bik dawn em mawni?

" I thik tur khawp in ka tan a pawimawh lo " ka ban a dawm in a lam ah min pawt hnai a, ka lo tang deuh na in ka awm hlai zet ah chuan min khuap bet leh run tawh a, a thinphu ri pawh hrechiang tak ka ni.  a chanchin hi hriat vek ka duh a, mahse ama ka atang ngei a hriat ka duh, zawh belh ka tum lo a, nghah mai chu tha in ka hria ani. In la hrang hlek chung a " Chaw i ei duh em? " ka tih tak ah chuan a nui suk ri in a zawm zat a " A van tui dawn " ti in chimawm fahran hian a mithmul a kan zauh a, a nui pah sak bawk a, chumi rual chiah a a biang vei lam a biangsum khuar kalh chu mawi chiang tak ani.

Chaw a ei lai te chuan a bul a thu turin min ti deuh tlat a, a duh a sawi zuah zuah a suah sak turin min ti zel bawk a, a chet dan avang chuan ka nui ru leh sak thin. Tlangval naupang tawhlo tak a ni ve tawh chung in tun a a chet dan hi chu tleirawl inla pangchang a ang ber. " I tihtauh lai khan ka rilru a hah lutuk " a ti chu " titau turin min siam tawh lo la a nih chu " ka lo ti zat a, " Ka tihpalh " a chaw bar thulh meuh a ,min en a a tih leh chuan " Ok, ka ngaidam che mahse lehpek awm lo se la " bu nghat in a bar zawm leh mawlh mawlh chu naupang thuawih thei deuh a ang riau in ka hria.

Dar 11 dawn thleng pawh in eng eng emaw sawi in kan la ri ve bal bal a, a haw dawn ah kawngka thleng thlah in ka kut a thil hmeh bel zeuh pah in " Ka lo hawn che " a ti a, ka hmui ah fawp zeuh in a kal nghal nulh a, a thil min pek ka en chu chocolate cheng 10 man chi hi a lo nia, nui var var chung a kheh in ka hmawm nghal hmak.