Dear Daniel CH-2

 Sunday tuk a ni a, nu Muani pawh kei leh Siamtei min kaihthawh tum in a au ring leh tawh khawp mai. Nu thothang tha leh harhvang tih tak ah keini pahnih mu rei thin lutuk hi a ngaithei vak lo a, room kawngkhar chum in a chang leh min vo a, a chang in min tur bawk. Chutiang thawm karah chuan mut luih reng theih ni hek lo ka tho ta nge nge a, Siamtei, rizai a inkhuh chung a la mu lui ngar ngar chu pawh thawh lawp pah chuan " Kan lo tho " ka ti zui lang lang. " In mak em em lutuk, inkhawm kan tlai phah mai ang tho vat ru " a rawn ti leh lang lang a.

Kawngkhar ka hawn rual chuan rawn lut in " In ti fai vat vat ula, chaw ei a hun lutuk tawh. In insiam rei leh awm si " ti in a chhuak zui leh mai a, Siamtei chuan en zui vung vung in " I chhelo a nih mai chu " a ti zui vak a a nui zui heu lehnghal. Nu Muani kal tawh pawh chu rawn hawi let in " Hmanhmawh la a nih chu " tiin a nui zui ve var var a. An nufa inngeih leh induat ka hmuh hian ka Nu ka hrechhuak a, ka ngai veng veng zel.

Kan in tih fai zawh a kan chhuk chuan midang chu an lo thu khawm thap tawh a, chhung inkhawmna kan neih zawh ah chaw ei te siam pui in, an nula thar Cindy chu nu Muani ho in kan pui zui laih laih a, tleirawl te, hmeltha veng si hi a ni reuh a, nu muani nen pawh an in nel hmel tawh khawp mai. 

" Mapui, naktuk ah maw i join dawn ? " pa buata'n chaw ei lai a a tih chuan " Ni tawh ang " a lo ti a, a hmelthat tehreng nen nelawm leh nui sang hmel han pu deuh se chu ka lo ti hmanhmawh leh tawh...

 chutah pa Buata bawk chuan " In dang melh pawh a ngailo ania, in luah man te hi a to tawh si a, nakinah nupui te pawh i la duh ve ang a chumi atan chuan khek zawk la a tha ania, sum khawl tluk hi a awm lo " ti leh in dawhkan a thawh san a, dik ka ti hle. Ka pa khan kan neih ve chhun te kha hralh lo in min hnutchhiah chhete tal han nei ve se chu, tun ang hian ka rethei lo ang a, sumdawnna eng emaw tal bul tan in mahni tawk ah ka awm ve thei viau tur ania.

" Nia, heta i awm hian ka tan pawh a nuam a, sumdawnna thil vang a zin a ngaih pawh in thlamuang deuh in i lo awm chuan ka kal thei tawh ang a " u Sangtean a lo ti ve bawk a.

U Mapuia chuan a chhang lem lo , heti reng a tawng mawh hi a nih chuan a Patient te tan a nuam awm lo, tih ka lo ngaihtuah kai leh daih a.

Siamtei nen chaw ei na te seng fel pui zung zung in insiam tur in kan chho a, kawr var simple tak ha in puan a tlang te tak te te a par ka bih a, ka sam dum hlap chu ka thlah leh tawp. " Siam enteh ka sam hi a sei mah mah tawh tiraw? inkhawm banah min lo tan teh " ka tih chuan hnai fe ah hian darthlalang chu a lo bih a, meng lian lui kuau chung hian mascara a lo in hnawih mawlh mawlh a, a hmai a buaipui chhung rei thei lutuk hi a mak. Eng em em a inhnawih ngai pawh hian ka hre silo a.

" Inhnawih ve rawh " ka lam a a rawn lek chu lo ban in ka thiam ang tawk chuan ka in hnawih ve mawlh mawlh a, rei fe Siamtei a insiam hnu a kan chhuk chuan an lo kal duak tawh. U Mapuia chu a kekawr ipte zen chung hian a lo ding a, ka ngaihbel deuh nge mawni min hmuh chuan a meng buai deuh riau in ka hria. A bul kan thlen rual in minlo nghah thu a sawi a, Cindy pawh hmanhmawh hmel fe hian a room atangin a rawn chhuak ve chiah bawk. " a hma ah khan chuang rawh " tih pah a Siamtei thu lut chu ka melh rawm a, ka awmdan chu ka hrethiam lo ka lai deuh hu nimai in ka hria.

Ka thu lut ta tho a, u Mapuia min lo melh chiang lutuk ka hmuh chuan ka kawchhung atang hian ka za chhuak vek, ka beng a sa nghal hat hat a, ka zak lutuk chu ka hawi kual nghal ruai mai. Nui suk ri ka hriat rual deuh thaw in a tlan chhuak a, Biakin kan thleng a, motor a park zo a rawn chhuah chuan " u Mapui, banah minlo haw san miah suh, ke in ka kal thui thei lo ania.. " a pheikhawk sang zet chu a ti lang sat sat a, " Kal pawh i kal thei ami? " pakhat in a lo ti a, Step lam chu melh zawk in " Min ti zak miah suh " tih leh u Sangtea lo dinna lam pan chuan min kal san a, keini pawh kan lut zui mai. Sunday hi chu khawlum lai phei chuan a ninawm bik. A boruak hrim hrim hian mutchhuak a keng a, chawhma inkhawm ah pawh kan muthlu leh fur tawh.

Kan zirlai te chu pakhat mah ka hre lo hrim hrim, Siamtei phei chu thawhlawm hlan lai atangin a muthlu tan tawh a.Ban hla sak dawn ah ka kaitho chawp a, phak zet a ding e ti lo chuan a zai tui leh em em ang lawi a, ka nuih a ti za reuh tak tak ani.

Inkhawm bang kan chhuah khawm chuan Siamtei chu a hmelhriat te ho nen an ding khawmuang a, an sir ah ngawi reng in ka lo ding a, an in be rei phian lehnghal. Ka ning tawh bawk si ka hawi kual chuan u Mapuia a car ngheng a min lo melh reng ka va hmu thut a, ka thin a rawn phu nghal zawih zawih. Hnuailam ka bih nghal vat a ka hawi chhuak ngam tawh lo hrim hrim, chuti chung chuan a mitmeng mawi zet kha ka mitthla ah a cham a dah chhuah a en leh hram erawh ka chak. Mahse, ka huaisenna in a tlin lo thung. Engvang a min melh apiang a hetia awm ziah mai hi nge maw ka nih le???

Rei fe hnuah chuan an in then thei hram a, Siamtei'n kal a rawt chuan ngawi reng in ka kalsan hmak. Ka ke na tawh lutuk avang chuan thut a, ka pheikhawk bun lai hlih vat bak ka rilru ah a awm lo, ngawi reng in ka kal pel vawk a, min kohna pawh chu ka hre lo der hmak. u Mapuia car bul ka thlen chuan zah pawh a lang tawh lo, kawngkhar hawng rawk in ka thu lut a, ka pheikhawk chu ka hlip nghal sawk sawk. ka kephah leh chawn kham lutuk pawh a dam nghal suai suai mai. 

" I va muthlu nasa ve " a lam ka hawi a, hma lam melh in a lo nui suk, ka muthlu lai kha minlo hmu a ni chiang mai, a van zahthlak thin tak. " Lalruati te chu a muthlu lo ngai hleinem " Siamtei'n a lo tih chuan " Nang phei chu i ang phuau, chilthli te kha i thlauh lo maw " a lo ti let zat a, ka lo nui hak hak. Zak viau e ti lo chuan chutia mi tam tak zing a min lo hmu bik te chuan eng emaw tak hian awm a ti nuam veng veng reuh a, chhungril ah hian a cham deuh tlat ani.

Chawhnu inkhawm tawh lo in inah kan awm a, midang zawng chu an inkhawm leh vek thung. Siamtei'n ka sam hmawr min paih sak a, a tan lai a ka duhdan ka lo sawi ve zat zat erawh in a thin ter tek a kaitho leh ni hmiang min nam bu leh lawp thin a, chutia kan lo buai dun ve em em lai chuan Samuela a rawn lang hlawl a, kan lo melh tawp ringawt. A mit meng sen ram leh phi chial atang chuan a pangai lo tih ka hre thei, a rawn hnai zel a mak ka tih deuh erawh zu rim a nam miah lo chu ani.

" Ti tawh suh ka ti che ani lawm ni Lalrinawm ? " Siamtei aw chu a chang fek fawk khawp mai, pakhat chu a lo nui suk duh chauh thung a, ka lamah a rawn in her a, min melh dan chuan ka hmul thi te hi a ti tho ur ur thei. Rum lutuk a min melh in a ner zui sawk a " He nu fuihpawrh vang che hian tiraw min then i tum ? " a tawng sehchilh nak in Siamtei chu a melh zui run a, ka tang teuh ringawt mai ani. Samuela thin butut zia hi ka hrechiang a, hmeichhe kutthlak a hreh loh zia nen. Inah tumah dang an awm silo. 

Chutah ka lam rawn hawi leh in " Inrawlh chin tawk hre rawh " ti hrawk in min melh zui khui a " Ve thlazen a che " ka lo tih chuan a ti lawm vak lo aniang a che hrut a ka lo tawlh hnung dat chu chalak fahran a nui in ka ke ler atang chuan min thlek zui dan dan a, a hmui a la liak hlup zui.

" I va han zak lo e aw...Ganja ka zu e te chu i la ti ve a, tu fuihpawrh mah ka ngailo, chhuak rawh ka duh tawhlo che a, ka then che a ni mai " a hmai si dawn khawp a hnai ah a au khum tuar a Samuela chu ka lo en reng, a bek pawng tawlh tawlh in Siamtei chu a rek thut a, ka hamhaih lutuk chu ka ding khawng reng ringawt.

 " Han tum chhin la " a kiai suk a, a hmel lan dan rapawm zet chu ka melh ngawt ngawt. Harhchhuak thut in ka thiannu, boruak a tlakchham vang a hmai sen vek chu ka melh zawk a, ka bakcheh ken lai chuan Samuela ban ah ka chhun pawp, rak thawt in Siamtei a reh na a thlah rual chuan min beng thuai a, ka lo in ringlo nen chhuatah chuan ka tlu nghal thlawrh mai.

Thil ri dawp ka hriat rual in ka hawichhuak nghal vat a, u Mapuia mitmeng dur khup chung a Samuela vial ngawl ngawl a lo dinchilh ka hmuh chuan ka tah a chhuak ringawt nia, ka mittui a rawn tling nghal pam a, ka hnar a thip  vet vet rual in ka biangah mittui a rawn luang thla nghal pap a, Siamtei lo la khuh bawrh bawrh lam chu pan in ka va kuah a, Samuela la rum ve ngal ngal chu tih theih dang nei vak lo chuan ka melh hrawk ringawt. 

A tlan phut um zui tum a u Mapuia che chhuak chu a ban ah ka lo vuan a, " Siamtei hi " thawk a la hawk a " Mate, na i nei em ? " ti in a rawn thu hniam vat a " aih, ka tha " tap tiau hian a lo ti let a, a awm dawm in a thaw zui hle hle a ka khawngaih reuh tak tak ani.

U Mapuia chuan min melh vang vang pah a  " I va huai ve " ti a a kiai suk chuan min ti zak, thil thleng rang lutuk avang khan ka hamhaih mai mai a, nilo se chu pot khan ka chhu thlu ngei ang, rin loh lutuk a a chet phut avang khan ka che buai deuh mai chauh ani. Rilru dawih viau e ti lo hian ka duh loh chin ah chuan ka che na ve phian zel .

" Tu bulah mah sawi suh, midang in an hriat chuan a buaithlak ang. Keiman tihdan tur ka hria " a tih tlat avang chuan u Mapuia pawn zep a remti ve hram a, Siamtei tih dan hriat chu engpawh ni se thil tha tak a ni dawn lo tih ka chiang. U Mapuia erawh in ngaihtuah zui hmel pawh a pu lo a, Siamtei pawh chu thil thleng awm lo ang mai hian a thawveng leh em em tawh a, chu te hlei hlei chuan ngaih an ti tha lo..

Zan lam ah chuan ka in a riah a rawt ve leh tlat thung a, thil thleng hre ve hek lo pa Buata pawn min lo phal sak ve leh mai bawk nen ngaih tha zan lo chuan ka thiannu phur zet chu ka zui chhuak leh ta chu a nia, in kan thlen veleh a ruahmanna te chu min hrilh thuak thuak a, ka nui hak. Samuela chu A buai phah in a thinrim khawp ang le. Alarm zing dar khat ah kan set a, dar 9 velah kan mu hmak. Kan alarm set a rik ral ral chuan rang zet hian a tho chhuak a, nidang a kaihthawh a har thin nen...

Ka thenawm dawr kawt a bawlhhlawh an dah khawm zing a garbage bag puar tha zet chu khai in a scooty hma ah a hlang a, Samuela te in lam pan chuan kan in khalh phei a. an in kawt kan thlen chuan bakcheh phawrh in a bike seat ka lo thai thler a, chutih chhung in Siamtei'n Samuela te in kawt ah bawlhhlawh chu a lo bun darh a, a nu pangpar pot ah te chuan a theh darh sak nuaih bawk. Ka bul a rawn thlen chuan nui sak in a bike ke chu hmun hrang hrang ah a hawlh thep leh hram a, kan nam tlu zui bawk. 

Chak fahran a in khalh haw in kan nui phei ham ham a, in kan thlen meuh chuan dar thum a ri tawh. Zing an thawh hun a an hmel awm dan tur te sawi vel in kan ti ti leh hrep phawt a, kan meng rei bawk nen thawh kan hai nasa dun khawp mai. 

Rawng kan bawl hman tawh loh avang in thingpui dawr thil a in hnawh puar mai tum chuan hmanhmawh zet hian dawr lam pan in kan tlan chhuak a, jam ah kan tang vei rawl nei u Sangtea chuan min hau leh ngei dawn a nih hi.

Dawr kan thlen chuan rin ang ngei in u Sangtea chuan kan tlai avang in min lo hau ngei a, mahse zan lam a kan thil tih in rilru a luah hneh rih em a kan la thutak tehchiam lo. Hahthlak tih hmel zet in thawk a la hluai a, chek zui hluk in hna thawk tur a min tih hnu ah a kal zui daih. Nileng chuan Siamtei mood chu tha tak ani, u Sangtea pawh chuan mak tih hmel deuh hian a melh leh vung vung zel a, u Mapuia  ka lo ngaichang ru ve ringawt a, mahse a rawn lan loh danah hna chu a zawm ta a nih ka ring.

Dar li velah a rawn lut hlawl a, midang ho chuan an lo be sap sap a, keichuan biak chu sawi loh en pawh ka lo en tha ngam lo. Tul lo zet in laptop chu ka on a, customer te chu ka be kual vak ringawt a, ka awmdan naupangchhia lutuk chuan nuih te lam lam a ti za. Kum 25 ka ni ve tawh a, mahse ka zahzum hi a reh thei lo, confi tak a awm hi ka thinrim lai chauh in ka nei

Ka hma a polithyne rawn khai va tu chu ka melh zawk a, min lo chhuk bih deuh ngur. " I damdawi tur " a ti leh tawp a ka lo la ve mai. Ka han en chiang chu damdawi a lo tam ngang mai a, vitamin, calcium, pum damdawi leh lung lam damdawi te an lo ni deuh nuaih mai. Mak ti zet a ka en hau lai in " Ei dan tur ka ziah kha " a ti leh a ka lo bu nghat. Engvanga hetiang hi ti nge maw a nih le??? Siamtei thusawi vang kha em mawni dawn ni??

" Ka lawm lutuk, engzat nge ka pek dawn che ? " ka han ti tha leh rih a " A ngailo, sample an nih kha " ti nghut in a kal zui daih a, ka melh mawl tawp. " Ehe, damdawi i va lei hnem ve " Siamtei'n ka bul a rawn thut thlak pah a a tih chuan " Ka lei pawh a nilo...u Mapuia khan min rawn pe ringawt a, i thil sawi vang kha aniang a...a nuam lo ee " ka ti duah a, a lo then nasa mai, a chek zui tlak tlak a. " Eh..ehem.. " te chu a la ti tak deuh deuh. Mi mah inthlahrun tehreng nen a kawi zawng a a lo la daih chu ka ngei reuh tak tak ani.

Zanah chuan Siamtei leh u Mapuia an rawn leng a, u Mapuia rawn tel ve ka hmuh chuan mak ka ti deuh a, " Enge in lo tih dawn??? " kati deuh hliai chu min rawn melh deuh kawk a " Lehkhabu ka rawn hawh dawn, bialpa ka nei tawh silo a, khawhar hnem a chhiar tur ka duh. I tah zawih zawihna thawnthu kha aw " a ti nghal zat zat a, chuti kher a a sawi chu ka ngei reuh tak tak. Amah bawk chuan " Sipai thih tum nurse nen inhmangaih kha " a rawn ti leh a " Gemini 13 kha maw? " ka lo ti let ha a " aniang, kha kha ka chhiar ve chak va la vat teh " a tih leh chuan ka lehkhabu dahna lamah chuan ka phei a, ka la a, ka pek chuan a kawm a mipa leh hmeichhia an kut inkai a zungbun inang bun yte chu a thlek vang vang a, a eng a mah hma a " Awi...a ril dawn " a ti hliai chu amah ngun zet a lo en ve u Mapuia pawh a nui chhuak hawk mai.

Thingpui te kan in a, rei fe chu an leng ve reng a, u Mapuia pawh a tawng duh ve sawt viau in ka hria. A aw thum bel bul lutuk leh a mitmeng thip ram te, a hmelthat bak a a hmel pa viau bawk si leh chumi hmeh lutuk a a khabe hmul to siar siar te, a nuih pah a a biang ding lam a biangsum khuar kalh te chu ka hriat loh kar in ka lo melh leh veng veng thin a, ka harh chhuah chuan ka zak ru veng veng zel. Mahse ka awm pui te pahnih chu ka awmdan hrethiam awm pawh chuan an awm lem lo.

 Dar 10 velah an haw a, ka huaisenna sawm khawm in tawngkam tha chuan u Mapuia chu lo leng leh tur chuan ka thlah ve ngei a, Siamtei mitmeg chimawm zet vang erwh chuan ka pangai thei thlawt lo thung. Ngaihzawng tia sawi tur hi pakhat chiah ka la nei a, kum 4 kan in zui ve a, mahse hmeichhe dang lak a min rinawm loh san avangin kan in then. Khata tang khan mipa hi ka ngaihsak tawhlo a, mipa lak atang hian ka in la hrang ve tlat thin. Ka pa in min boral san ve leh tak si avang a ka nun hniam lai kher a min lo phatsan ve leh zel avang khan depression leh anxiety ka neih phah a, ka nun a buai vek nghe nghe ani. 

Psychiatrist te pan in Siamtei te chhungkaw puihna nen mi pangai dinhmun ah ka ding ve leh thei hram a, tunah chuan Remruata nen kan inthenna pawh kum nga lai a lo liam ve tawh. Ani pawh nupui neiin  nun thar in a nung a, fa erawh an la nei lo. Tun hnai te hian min rawn biak a ching thar a, lo biak that viau erawh ka tum lo thung. Ka lak a beisei nei tur ang zawng in ka be ngailo a, ani pawn beisei a nei ngam in ka ring lo. An nupa chungchang a a rilru hahna te, min phatsan a inchhir zia erawh a sawi fo thung a, lo sawi pui erawh ka duhlo a, a msg hi ka reply ngai meuh lo.

U Mapuia hi Remruata hnu a mipa ka thinphu ti rang thei ka tawn hmasak ber a ni a, mipa lak a in ham tan leh hi tumna ka nei lo a, ka duhlo bawk, amaherawh chu ka duhna te chu ka thinlung hian a pawm si lo a, ka thunun theih piah lam a nih miau avang in tih tawp dan tur lah ka hre miah lo bawk. 

Kan tih nek nek chhung in thla khat a liam ve der a, u Sangtea'n hlawh min sem lai chuan ka nui var var a, mahni thawhchhuah ngei ham hum hi chu a nuam ve riau ani. " Kha bonus ka pe ang che, i inhralh tha em mai " ti in rs 3000 lai min pek belh a, ka han chhiar chuan a vaiin Rs 15000 lai a lo ni, lawmthu te ka hrilh mawlh mawlh a, a ngaihsak hmel vak lo na in a hlim hmel ve tho mai.

Tlai haw pah in chhuatnawhna thar ka lei a, thlai hnah leh zan ei tur te nen ka in lei ve nual a, Siamtei pawh a hlawh la chu nuam a ti ngang mai, " kan hlawh lak hmasak ber hian thil in lei sak ang " a tih chuan ka lo pawm khawp mai. U Sangtea te chhungkua hi engemaw tal lei sak ka rilruk a, siamtei chuan a inang in lei ang a tih tlat avang in lipstick a lei a, kei in bracelet ka lei thung a, kan hlim ve hle. pa buata chu a hman tangkai theih tur pen ka lei sak a, nu Muani pawh a ngainat eme m Bakkilh ka lei sak a. U Sangtea chu Tshirt ka lei sak thung. " U Mapuia pawhj lei sak ve la, damdawi pawh a pek teuh che kha " Siamtei'n a tih chuan a dik ka ti viau a, lei sak ve pawh a tirah kha chuan ka rilruk reng  mahse... min lo ngaih dik loh ka hlau ani.

" Min ngaih dik loh phah vek ang e " ka tih chuan " Chutiang in a ngai teuh lo, lo ngai pawh ni se a pawi mi? i duh ve tho kha " a ti ta mai chu ka va han phu nasa tak. " A awiawmloh "   " Ka hre vek...ka rawn len pui zan pawh khan i en ngawih ngawih kha aw " a tih leh phei chuan ka din na lei hi rawn in hawng se, min dawlh daih se ka ti.

 " Pi, a var kha pakhat minlo pe leh mai " a tih zawm zat a, a khung mawlh mawlh hnu ah dawr atang chuan kan inzui chhuak leh a, Siamtei thil sawi kha ka ngaihtuah leh ngut ngut tawh. Ka lo ti lang viau em mawni? 

" Siam pe leh lo mai ang " a ban a pawh pah chuan ka ti a,a lo chek tlak  " A ho mai mai, a ni pawn a duh ve tho che " ti a a kal zui daih chu phur lo zet in ka zui dat dat a, thildang daih sawi in a tawng leh lawng lawng tawh a, a scooty park na kan thlen hnu a kan in khalh chhuah thleng pawh chuan thil dang ka ngaihtuah thei lo. " a duh ve tho che " a tih kha ka bengah hian a ri nawn tlut tlut a, han zawh chian lah ka zakk ve deuh bawk si, ani lah chu sawi lo ang hmak in a awm leh tawh a a ngaihtuahna ah a awm zui hauh lo.

Inchhungah a rawn lut leh hram phawt a, thingpui in leh te te in thim hnu ah a haw a, a chhuah dawn ah rawn hawi let in " U Mapuia chuan a duh ngawt ang " tiin a nui ver ver reuh a, ka lai leh em em tawh. Nui ham ham chung in a chhuak a, Siamtei liam fel hnu chuan ka rilru a insual nasa viau... u Mapuia chuan engtin nge a lo ngaih ang? A lo la duh ang em? tih vel ngaihtuah chuan mahni te in ka buai ve khawp mai. Doctor meuh ani a khatiang Tshirt man tlawm chu a hak duh pawh ka ring lo. Siamtei sawi danah an hausak hmel nasa si a, ka lo lei mai chu ka inchhir hnuhnawh hle ringawt, tih theih lah chu a awm tawh der mai silo.

Chaw ka ei kham ah chhuat te nawt in ka insu bawk a, chhun lamah ka khawih hman thin lo nen furniture te ka nawt pah bawk a, ka chet zawh meuh chuan dar 9 a lo ri leh der tawh. Siamtei bul a chanchin zawh  tum a phone ka lek kan rual in number save loh atang hian message ka dawng a, " Ka lawm e " ka chhiar lai te chuan u Mapuia a nih ngei ring in ka thin a phu zawih zawih a, ka zah viau rual in nuam ka ti leh lawi a, ka awmdan chu ka sawifiah thiam lo.

" Imm keipawh " tih zawng chu type in ka thawn let a, ka number a save a niang a dp ka hmu nghal bawk, save ve mai ka tum lai in Siamtei'n a rawn call a, ka pick up rual rual in a tawng leh nghal; char char, tawng ve na hun pawh ka neilo. " A lawm aniang a nui vur vur mai, " tih te, a chhungte ho lawm zia thu te a sawi a, " Chuan maw u Sangtea'n min hmangaihna kha a la reh lo ami? a ti lo ti rawh " ka lo ner nang a u Sangtea min chhaih ve dan hi chu ka zak thei ani.

" u Mapuia ka number i pe ami? " ka tih chuan " Pe e..lawmthu sawi ka duh a tia " awlsam zet hian a ti a, min zawh chhunzawm lo a, engmah ka sawi zawm duh ta bik lo. A thawnthu chhiar ah chuan a luangliam hneh ngang ni tur ani " Enteh Katei hi a mawl e...tih te Timothy hi ka khawngaih tih vel leh Patriciai nen hian innei daih se " tih angreng sawi chuan darkar khat zet kan inbe leh a rei fe hnuah call kan ti tawp thei hram. U Mapuia message a lo awm leh ka beisei ruk viau laiin a lo awm miah lo a, atthlak ti lutuk a lu thing nar in mu tur in room ah ka lut a, reilote ah ka muhil ve leh mai bawk.

Dawr pawh a pangaiin a kal a ni mai ang chu, kan buai ngai in kan buai reng. " Ruatruat, vawiin tlai chu haw rual ang aw " kan thawhpui Puia chuan ka bul a rawn thut pah hian a ti a, kan in nel ve viau tawh. Kan veng a inang bawk a, haw rual pui ah min sawm zing ve tawh bawk nen lo hnial leh chu ka hreh tawh a, aw ka lo pawh ve ta nge nge. Phur hmel zet a tho in a kal a, a hlim hmel lutuk chuan min nuih tir tawp. Siamtei bul a chhuanlam siam dan tur erawh ka ngaihtuah chhuah vat a ngai. Puia hian Zan lamah hian minlo be ve zeuh zeuh thin a, thian ah kan insiam tawh bawk a, mi fel tak ni in ka hre bawk. Mahse, Siamtei erawh a ngainat hmel vak loh thung a.

Tlai banah chuan minlo nghak ta ngei a, pawn kan chhuah veleh ' Siam, Puia saw sawtah ka kal pui dawn a ka kal mai ang aw " tih leh a chhan hman lek lo a rang a kal ka rual a, Puia bul ka va thlen chuan bike ah ka lawn sawk sawk a " Hmanhmawh rawh " ka tur nghal zat a, mak tih hmel zet a min en in bike a ti nung a chu erawh ka ngaipawimawh hman tawh lo. Siamtei rawn au thawt ka hriat rual in a tlan chhuak nghal a, ka thiannu dawt ka hrilh leh ka phatsan chu ka inthiam lo hle... Mahse, ka haw rual pui dawn tih kha sawi ta ila, ngaih loh loh in a ngai leh ang a kan buai zawk ka hlau si a, kha bak tihdan tur ka ngaihtuah chhuak thei tlat silo ani. Nakinah ngaihdam ka dil mai ang.

Siamtei chuan min rawn be miah lo a, ka message lah a chhang duh bawk silo a, rilru chu a nuam chiah lo. Kawngka bulah chuan tu te nge maw awm ni an thawm leh sat sat thin a, addict ho in inchiu nan an rawn hmang em maw ni?? ka ngaih chu a tha zan lo, chutah hmeichhe thinrim rawl rawn chhuak in  "Lalremruat min thlah vat mai rawh aw.. sawtiang mi pa pawh kawp hreh lo saw ka sawisa dawn khawp " seh chilh nak hian a ti a, " Lo kal rawh, i mawl ami? " mipa aw in a tih ve rual in thawm ri leh khat khat a, an in pawt a nih ka ring.

"Lalruathlu rawn hawng vat teh i awm tih ka hria ania" a rawn tih lawng lawng tak ah chuan ka bangbo ngei mai, kawngka chu ka pan a,ka hawn rual rual chuan ka sam ah mi rawn tham nghal nawk nawk a "Enge i hriat a min thlah vat rawh" min keh kun tlat avang chuan dah pawh ka dak chhuak thei lo. Anchhia min lawh bawrh bawrh a zu rim a nam huam bawk.

"Lalrinsang thlah rawh" tih pah in chupa chuan a phih lawp a ka sam chu a kek thla nual ngei ang, ka hma a inthlahrun hmel zet a Remruata lo ding ka hmuh chuan ka sa ve phat a, Rinsangi lah chuan an pa man beh na chu tal chhuah tum in a lo phih ve sawk sawk bawk.  "Engvanga mi rawn khawih ringawt nge i nih a? " thinrim insum zet in ka ti a, ka melh nghal kal . 

"mi pa ngaizawng tur khawp chuan ka lo ringlo che a sin i hmel pawi sawilo zet phen a i tenawm zia hi" hmuhsit hmel zet a min melh chung in a nui hak a, ka chhan ngaihna hrelo lutuk chu ka lo thaw halh ringawt. " Enge in lo tih a? Tu in maw mi pa ngaizawng a? " Siamtei kawngka bul a lo ding reng ka hmuh chuan ka hahdam huai mai, rawn lut in min thlek kual a " Engatinge i sam te hi? " a tih lai a a mitmeng chu ling tha tak ani. " A pawi hle mai Ruatruat.. " Remruata tawng lai chu lo pawt chat leh in " Nang nu khan i lo khawih elaw? " tih leh rinsangi pan a tham a rual a, amah ai a te leh cher zawk bawk si chu a hneh viau, a thing nawk nawk mai. 

Rei fe an in sual hnu ah chuan kan thelh thei hram a, " Hetiang mi hur thlavang hi i hauh ve chu ania " Rinsangi tawng lai chu rapthlak ti lutuk in ka en a, " I van zak lo tak, tu pasal nge ka ngaihzawn a ? Khatiang a mihur te min rawn tih ringawt " ka ti a, chuti em a dawt ngialngan a min rawn puh avang chuan ka tah te chu a chhuak hlui mai. " Remruata i la rawn zar reng hi ka hrelo emaw i tia mi? Ka hriat loh a ka pasal nen in kawp chu a har viau ang" ka nui hak a, thil kal dan chu leh...ka zak zawk.

" I pasal kha ngatanmah ka ti lo "  " Aw... chuvang ami zanrei tak tak thleng a i rawn biak, Eng atan mah a i tih loh vang hian ani lawmni sleeping pills ei ngai khawp a i awm" ti in a au leh tuar tuar a, chu thu kher chuan mi vit zawk ni mai in ka hria, ka mitthla ah ka hun liam tawh an rawn in lar zut zut a, ka na nawn awn awn a ni ber. Mahse, he pa ka hma a ding in a min phatsan leh amah ka duhna vang kha nilo in ka thil tawrh tak te khan ani min ti na thar leh. Hetiang mipa rinawm lo avang a ka lo tuar nasa lutuk kha keimah ka in khawngaih zawk.

Siamtei chet chhuah mai tum chu Remruata chuan a lo dang a " Min khawih suh, tenawm " ti hlak in Remruata khawihna lai chu ten hmel zet hian a hru nawk nawk a, a nupui lam chu hawi in 

"I va han nasa tak aw..rawn kal teh haw ang Ruatruat a pawi ka ti lutuk henu hi a â anih hi"  a ban a kai pah a a tih chuan Rinsangi chuan duh lo in a lo thin thlak sak leh nawk mai ka lam chu rawn hawi leh ngat in

"Lalruathlu nang ang fahrah lehnghal rethei bawk si hi chuan i nun tha tak in hmang ta che, mi pa be kual vel lo hian i phu tawk zawng zawk rawh, induhtawkna te hi nei ve ta che, heti em em hian ami mipa ilo mamawh a? a awm tho e...zilh tu neilo tih awm tawk lek ani " ti a ka fahrahna hmang kher a mi diriam chuan ka insum theihna bawm a hawlh keh chiang ngei mai.Ngawi reng in a hmai ah ka hnek sawk a,a chhip sam ah tham in ka hnuk a ban ah ka tauh tih nghek a. Siamtei rawn che ve in kan sual rawn a ni mai a, Rinsangi chu rak tuar tuar chung in  a kat dawr dawr a ni ber, an pa lah chuan chhan a tum lo nge ni a lo ding mai mai bawk. Chutia kan khawih rawn hrep hnu ah chuan Remruata'n ngaihdam dil mawlh mawlh chung in  min rawn pawt then thei hram a. . 

A hmai a thisen luang ngiai leh pai khat khat chung pawh chuan tlawm lo zet hian  min la melh kar mai lehnghal, va din hnaih in a hmai si lek lek chuan ka kun hniam a "Hre rawh i pasal hi ka duh loh vang a nei ve thei mai mai i nih hi.I naupai chhuanlam a hmang a uai beh i tum tang tang lai khan nei suh min tih chuan ka neilo ang tiin thingthi meuhin ngaihdam min dil tih hria la, ka khawngaihna vang a nei mai mai i nih hi.Min rawn thik buai duh tawh suh chuan engatan mah ka tilo bawk chhuak vang vang rawh u" ka tih chuan engmah a sawi ve tawhlo, an nupa chuan an chhuak hnak hnak a.Rinsangi erawh a la tlawm lo tih hriat zet a min la rawn melh rum zui tawk tawk a, kawngka bul atang chuan 

"Nang mi á enkawl dam leh mai mai khan min khawih hi i la inchhir ang " a la rawn tih hramna chu

"Mi â an enkawl dam theih tawh loh, nangchu in enkawl ve duh suh i dam thei tawh chuanglo ang" Siamtei'n a lo ti let ve leh

"Zawngi" tih pah a rawn pan hnaih leh a tum chu an pa chuan a pawt  dawr dawr a, ka inluah neitu te rawn lut in thil awmzia min rawn zawt nghal mawlh mawlh. Rinsangi thawm kha a ring tha kher bawk nen zahthlak tak ani. In neitu te hnen a thil awmzia kan sawi tak ah chuan an ni pawn minlo hrethiam viau a, pu Rema phei chuan police a report te hial a tum ut ut a, chu em erawh a thleng lo thung. 

An chhuah hnu ah chuan Siamtei'n thil awmzia min zawt tha leh a, kei ai ai a thinrim in ka thinrim ve tur zawng zawng pawh a nei zo vek ni mai in ka hria. " A la hre dawn alawm " ti nghat in a phone a bih leh daih lawi a, keipawh ka phone ka en chu Remruata message a lo awm a, thupha chawina tih angreng vel ani. Hawn pawh hawng lo in ka delete a, ka block zui nghal hmak bawk. Hemi te nen a in hnim hnaih leh hi eng ti zawng pawn ka duh lo. 

U Mapuia message rawn thleng chu ka hawng nghal vat a " Enge i tih? " tih zawng a ni " Eng vak mah ka ti lo, nang? " ka hmui hnuai ka pet zeuh a, ka lai leh ringawt tawh " Ka duty " a va han tawi thin tak " Imm... a va ninawm dawn ve " minute 5 hnu ah pawh min reply tawh loh avang chuan ka phone dah in Siamtei lam ah ka in her a, " Hrim hrim in zan zan ah enge i rawn tih dawn a, ka call i la duh bawk silo a, message lah i chhang duh lo a " ka tih chuan rum zet a min melh a rual a " Phatsan tu " a ti zui hlak a, ka nuih tlawn ringawt. Tlai a ka haw san avang khan thinrim in a rawn kal a nih hmel. Kei lah chu chhan ngai in ka lo la awm zui a.

" Engvang a min phatsan nge i nih? I thianpa thar kha lo chhan tir zawk tur che ania " pawi tih hmel zet a a ner a ner chu ka va kuah a, " Haw pui ah min sawm zing tawh lutuk a, ka hnial hreh ve tawh bawk sia, tun bak chu a thleng tawhlo ang " ka ti zui niah niah. " a lo ngaizawng ringawt che ange, a mawl hmel si  " ti leh nghat in min melh tur zui khai a, " Ngaizawng awm lo em mai, coffee in ang aw " choka lam pan in ka kal a, no lian tawk a coffee chawi chung a ka let leh lai chuan u Mapuia a rawn lang hlawl. 

" Eh..enge i rawn tih dawn ? ka duty dawn te kha i ti sia " Siamtei'n a lo ti hluai a, a hmel atang pawn mak a tih tih a hriat. " Ka leng dawn " pakhat chuan a lo ti nghut a, keipawn a rawn lang thut chu mak ka ti ve reng. Ka bul ah chuan a rawn thu a, kan in si lek lek, a rimtui em em mai lehnghal. " Kan len na a inang tho a min thlah rawh aw, scooty ka keng lo a "   " Ka peih lo " deuh tawp a. A nui deuh in ka hria " Keimah in ka haw thei nang " Siamtei'n a tih leh lai in " Nangmah in alawm i kal " a lo ti leh then a, tum bar in a hawi hmak a, rawn leh hawi thut in " In inngaizawng ami? " awm ang lo hian...Siamtei chu ka melh kawk a " Teuh lo.. " ka ti vak. U Mapuia chuan engemaw tal sawi ve se ka ti a, mahse sawi tum hmel pawn a awm lo.

" Coffee ka va siam ve ang che " ti in ka tho daih a, Siamtei"n min rawn zui nghal chu ka hrereng. " Thil zep hi i nei reng mai " min chhuahchhal ti tih hian a ti a, " Engmah ka zep lo, kan inngaizawng lo tak tak " ka lo ti let ve " Chiah?? "   "Umm " 

" Anih enge a rawn len ve ringawt ? "   " Ka hre nang...a lo leng ve chak aniang chu "   " Ka ringhlel tlat che, i awmdan te hi i hlauthawng reng a, dawt i sawi a i awmdan nen khan a inang, thil zawt che ila i awki i san vak zel lehnghal " awiii teh chai hian

 " A awihawm loh lutuk, dawt ka sawi lo. Kan in be ve zeuh zeuh thin a, chubak engmah a awm lo "  a mitmeng leh che vel atang pawh chuan min han rin loh hmel em em khawp a, insawifiah ka tumna lam ah ka awk lo chauh zawk nimai in ka hria.

  " I duh chuan ka tihpui ang che, ka u a nih saw " in tih theih hmel fe a a nui sang chu ka ner khum nak a  " Chutiag ka peih lo " tiin, coffee no chawi chung chuan ka kal pel hmak a. A nui har har ri in a zawm zat bawk.