ZOREMTLUANGA CH~1

 

" Pa... dawt ka sawi lo tak tak "  ka sam a tham chung a min thing nawk nawk tu chu thei leh thei lo en tawk tawk chung leh tap chung in ka hrilh mawlh mawlh a, a kut hrawl pui a nghet tak a min tham beh tlat avang in ka lu vun te chu an thip thum tawh. 

" Zuala...thlah rawh i mak zo zai lutuk em mai " ti a min tham na a rawn vawn rual chuan " Lo in rawlh tei vet suh " ti in a kut lehlam min tham loh na zawk chuan a vai zui lawp a. Ka nu a te thawt rual in pindan bang plywood a ri nghal dawp a, ka nu buaipui tur a kal mai ka tum lai in ka pa in nghet zet in min lo la tham reng mai bawk si. Ka va han mangang tak...

" Sawi rawh, tu nge i sawn pai na pa chu ? Khawnge ka chem kha ? ka'n that law law ang che, min va han ti zak zo zai ve " tia ring tak a au chung leh ka sam la tham reng chung in kan inchhung zim te ah chuan a vei vut vut a, a rui bawk nen a pai tuang tuang a, a bu leh luk thin. Min la thlah miau loh avang in a kal na apiang ah ka kal ve zel lo thei lo a, min dim lo em em mai bawk si. Ka lu vun chu a in hik thei takngial dawn in ka hria.

" Pa... ka sawi tawh chu tu fa mah ka pai lo... " ka tih lai in a thil zawn chu a hmu ta aniang min nam thut hnawk a rual a, ka dak chhuak in a hmel ka han hmu chu ka dam chhung zawng a ka pa hmel ka mitthla apiang a cham hlen tawh tur ani. A mit a sen rum a, a meng phelh phung bawk, min thah hreh na pakhat mah a neih loh zia ka hmu chiang kher mai. 

A zu ruih sual apiang han ti dawn ila ruih sual loh lai a nei lo zawk. Thah a a vau reng thin kha ka ni miau a, a tum a tum ngar ngar ta chuan a thlen tir dawn ta ngei in ka hria a, ka mit ka chhing ta tawp mai ani.

" Lalsangzual... dah rawh " Patling thinrim aw rawn chhuak in chu aw ka hriat rual chuan ka thaw nghal huai a, ka pu aw ngei ani. Ka pa min tham na kut a rawn phih dawt dawt tak ah chuan a ni pawn a lo thlah ve mai a,  tho chhuak nghal vat in ka pu chu ka kuah thlawp a, a awm ah ka hmai phum in, ka tap nghal hliam hliam.

" U Zual i mak em mai, hetia fa te tih ziah " nute Siami'n a rawn ti zui hlak hlak a, ka pa chem chhuat a awm chu chhar in a dah fel zui hmak bawk. Chutah ka pa chuan " Nang mo mai mai khan ka zilh e te chu mi ti khanglang suh. Ka vang a i pasal pawh hi nei thei i nih hi i hria em? " a lo ti let khur khur a, a pawr thar leh ta kher mai. 

A vin tun tun reng chu hlau in ka pu ka kuah na chu ka ti nghet sauh sauh a, mahni pa ngei hlau a khur in min chhan tu tur ka zawng ruai chu a nia... ka va han in khawngaih ngawih ngawih tak em...

Min lo kuah let in a kut zur tan ve tawh tak chuan ka sam ah a chul a, a lehlam in ka hnung ah a beng thak thak bawk. " Mampui thu ang aw " dam dap si thinrim insum tih hriat tak a khur hlak chung a a tih chuan ka dak chhuak a. Ka nu tluk na lam ka va hawi chuan ka patea te nupa in an lo kai tho a, nute Siami'n a lu a lo tuam sak mawlh mawlh tawh. A tha tih ka hriat chuan ka hahdam phah deuh.

 Thutthleng sei lo hnai ber a min thut tir hnu ah ka pu chu tho chhuak in ka pa zurui, chhuat a a kut pahnih a a khup dawm chung a lo thu thluang duai lam pan in a phei a, thaw dep dep in ka en zui kar.

" Lalsangzual, thutthleng ah hian rawn thu rawh " dam dap, khauh tak si in a ti fak a a melh rum zui ul bawk. Ka pa zurui pawn ka pu thu kher chu a zawm lo ngam bik lo aniang chu, a rawn in sawn zui hnu hnu a. Ka hmai a ben na sa hap hap leh chhah deuh tap  dawm a ka lo in sut feih feih chu rum zet a min rawn melh chung hian a chek zui hluk a, min rawn khawih leh duh mai tur a ka rin na chuan min ip tir nghal chawih chawih mai.

Ka pa hma ah tak ah ding luah a rum zet a melh chung in" Tun ang tawh a au lùng lùng zel mai. Mi pawh in ti mu thei hleinem. Zan tin i ang thawm hriat tur awm ziah te hi thenawm khawveng te pawh an zahawm zozai lutuk " ti in a melh thip kher mai. Ka pu hi pa zaidam tawp a ni a, a thinrim lai hi ka la hmu lo .Heti khawp a ka pa in sual rawng a bawl chung pawh hian kutthlak chu sawi loh awka vin a a biak takngial pawh hi ka la hre ngai lo hrim hrim.

" Enge in buaina ni leh reng reng a? " ka lam rawn hawi in a ti a, la in sut faih faih chung in ka lehkha zir lai a thla hnih ka period tawh loh thu leh in entir ka duh thu  ka nu hnen a ka sawi chu a lo lak kawih thu te, a thinrim pui tak chiam dan chu ka sawi a, nute Siami lo chek tlak tlak chung a ka pa rapthlak tih hmel zet hian a melh tlawk tlawk chu ka en pah zauh zauh bawk.

 

" Engtia tih chi hi nge maw i nih zo zai ni? I dam loh leh mi ti buai bawk, i dam lah in buai loh lai nei reng reng lo. I ân a chhe si a tih ngaihna tak pawh hi ka hre lo che " hahthlak tih hmel zet in a thaw zui halh a, ka khawngaih takzet tun ang kum tawh ah pawh an fapa vang hian tlaivar a an tawngtai chang leh ka pu phei chu a lung tha lo a chhuah chang a tam a, kan chhungkua vang a an tawrh na te ka hmuh hian ka in thlahrung ngawih ngawih a, an in ah pawh ka kal that duh loh phah fo mai.

Fate sualna avang a nu leh pa puh ngawt lo dik loh zia hi ka pa atang hian keichuan ka hre chiang hle in ka hria. Pathian tih leh tawngtai thlahthlam ngai lo, an theih ang tawk a an fate tan a in pe ka pi leh pu te hi keichuan dem na ka nei lo a, thiam loh na pakhat mah an nei lo tih hi ka chiang.

" Mama, hetiang a fa te chung a tawngkam hman fo te hi a malsawm lo asin.. " ka patea chuan a lo ti ve bawk a, min duat em em tu a nia, a lakah pawh ka pangchang hle thin mahse sawi tawh ang khan ka pa vang bawk hian an zavai lak ah ka inthlahrung zo a, ka chhungte hi ka hnaih tha ngam tawh lo in a hma ang khan ka duh duh dil in ka nel tawh lo.

Ka pu leh ka patea te'n an zilh lai chuan mi fel ber awm in a awm leh daih tawh a, a tih thin dan reng ani. A ngawi reng a, a in hmuchhuak leh tep tawh in ka ring. 

" Muani pawh thinrim tih vang a rawl rin vak te hi sim tum la, kawr kam a awm in nia, zan reh tawh lam ah phei chuan tawng thawm te hi a ring duh. " ka pu in a ti leh a, ka lo ner ru sak thung. A thiam lo ber chauh hi hau mai rawh se tunge khatiang tawh a rawl rin lo thei mihring awm ang tih chu ka ngaihdan ani. Ka pa thiam loh na ngawih ngawih ah pawh ka nu an hau tel ve kher zel hian lung chu a ti awi chiah lo.

" Ti khan ngawi reng in mu rawh u, bawiha nang pawh zu in hi sim tum rawh zu hian thil tha engmah a thlen lo a, chhungkaw hlimna dal tu ani. Fanu nula i nei ve tawh hetiang a awm reng tur a ni ngailo" a ti leh nghat nghat a. " Kohhran leh khawtlang pawh an zahawm alawm le...i dam nan theih tawp a an tawngtai pui zar zo in mitthi tawh pawh i dam leh a " a ti a, a hmel hrehawm tihna leh rilru nat na thuk tak langchhuak chu hmuh hrehawm ka ti...

" Ni e, ka tum dawn nia " dam thluam a ti chung in a in sut leh hruih a, a lam ka va melh chu a khup chung a a kut dah in a lo kun ngur a, zawm tum ve tak tak te pawh a ang alawm le... mahse kei chuan rin na chhete mah ka nei miah lo. Hei hi chu kan thawm a nat zual tum a ka pu in a hauh apiang a a awm dan a nia, ngai ah ka nei tawh.

Ka pu te chhoh hnu ah chuan a ngawi zui ve mai dawn emaw ka tih lai in ka nu chu a melh ngur a " I aw ring lutuk vang a kan mualpho hnem zia hi. Bang thlang den nan  chuan ka hmang dawn che mawnle " a ti zui khur khur. A mah a a pa lian a, a hlauhawm tham ve bawk si. Keini hmeichhe pahnih lek lakah chuan in vaivung tak hi a ni ringawt.

Room ah lut in a zu dah that a phawrh a no ah thli in a tui in zui nghal hmiah a, a duh tawk a in ta aniang thutthleng ah a let thla zui hnawk a " Lalhriatpui puan sin tur min rawn pe rawh khatiang pitar bulah khan ka mu peihlo " vin zet a a tih chuan hmanhmawh zet in room ah ka lut a, puan la in ka sin tir leh hnu ah ka nu chu ka kai a, khum a ka mut tir zawh chuan damdawi te ei tir in a mittui tla zawih zawih ka hmuh chuan ka khawchhung hi a sa pup pup nimai in ka hria.

 Lehkha zir tur in ka thu leh a, mahse, ka zir nasat viau pawn ka rilru ah a lut thei der lo. Kan chhungkaw buaina avang a ka zirlai a ka tlakhniam zia hi ka hrechiang hle. Ka han zir dawn thin a, thil dang bawk in ka rilru a lua leh thin.

" Pitar " ti a a sawi kher chuan ka rilru a luah reng a, a ti na takzet, amah enkawl reng reng in a buai a, a zu in nasat avang in kum khat ah damdawiin hi vawi 5 chu kan lut ngei ngei. A dam deuh a, inchhung ah buaina a siam reng a. Zan mu thei lo in min siam awl lo bawk. 

Dept pakhat ah master role in a thawk ve a, thlakhat ah cheng sangriat vel a hlawh ve lah chu a chanve hmawk a zu man ba ah pek a ngai a, cheng sangli vel in chhungkua min chawm a, chuti chung chuan pawisa kan neih loh deuh chang in ka nu chu pawisa hmang thiam lo ah a chhuah leh hlauh zel. A hlawh lak a a kim a a pek chauh kha hria in a hnu a a lakchhuah leh erawh a hre duh leh tawh ngai der lo thung.

Rilru hah reng reng in a siam a, nu lian tak ni thin kha a cher in  pitar ang mai a zûr ah a siam te te a, chuta a la hmusit khanglang chuan ka pa min ngei zual tir a tih theih ka nei si lo. A chang chuan " Ka pa hi thi daih se aw... " tih vawng vawng tum ka ngah mai.

Ka zir theih thlawt loh avang in ka lehkhabu chu ka khup thawk a, class 12 ka zir ve tawh a karleh mai ah board exam ka hmachhawn dawn a, engtham mah ka la thiam lo. Ka thiam thei lo leh ka pa lak a ka thinrim bawk si chuan ka sam ka tham nghek ringawt. In hriktlakna dang nei lo rilru ipik bawk si chu keimah in tih nat ah bawk ka tuan leh mai thin.

Thinrim tun in ka nu bul ah ka inthawlh a, rei ngial ka tum hnu ah pawh ka muhil thei thlawt lo. Ka nu tih harh hlau zet in ka in let tawn chhen a, ka pa hnar bur bur lai chu va thawh lawk a chum hrep mai ka duh. Midang chuan rapthlak leh rilru chhia pawh min ti maithei mahse hetiang khawp a min hmangaih lo tu hi ka haw hluah hluah.

Zing hma tak ah tho in eirawng ka bawl a, ka zirlai ka bih pah bawk. Ka pa rawn tho chu chuan min rawn en vung vung a, ka lo melh ralh peih tawk. A chhuak leh nghal vut erawh ka ngaihsak tehchiam lo zu in tur bawk in a kal leh tih ka chiang em ani.

Ka nu rawn thawh chhuah rual in chaw ei ka siam hmak a, kan pahnih te chuan ngawi reng in kan ei mawlh mawlh. Ka insum thei thlawt tawh lo chuan " Nu, ka pa hi then la haw i hreh pawh in Aizawl ah kan pem ang a, kan nghei bik lo ang. Hna ka zawng ang a ka chawm thei em em ang che " ka ti tawl a, ka melh zui kiau bawk.

" Insiam la kal vat rawh i tlai ang " a lo ti daih thung a, ka pa then tur a ka tih apiang a thil dang a sawi ziah chuka ngaihdan a pel kher mai. " Enge i then hreh em em a, heti khawp hian a hmusit che, a farnu te thleng pawn. Enge i hriat a i hlau ami? " ka ti leh ngat a, a thaw halh chu rum zet in ka melh zui reng.

" Pathian hma ah thu kan tiam tawh a, ka thutiam bawhchhe tu zawk nih hi ka ngam lo, pasal i neih hunah i la hrethiam ve mai ang " a ti dap dap chu ner nawng in ka chek khum zui tlak tlak. 

" Pathian khian a hrethiam em em ang che. A nih loh leh i tawrh ai chu min tawrh tir mai rawh se. Chutiang khawp a rilru te a nih leh ka tuar vek mai ang. Thutiam mai mai vang a mihring pahnih hrehawm tak tawrh tir reng duh Pathian a ni lo ang. " ti in ka thlem zui ti tih a, ka pa hi then se kal bo san vang vang ila ka duh. 

A nui zui hak hak a a mitmeng dul raih leh a lu in tuam bar te chuan ka thinlung chhung hi an ti na, a kut cher riak leh a taksa a thau awmlo tih hriat zet te chu ka en vang vang a, veng khat nula chhuanvawr, hmeltha leh hleitling ti a mi te sawi thin chu tunah chuan ruhro hlang, vun in a tuam ve tawk tawk a ang ber.

" A riang lunglawm ve nan maw biahthu di min hlan mai se maw..Aw di Chambawihpuii'n " teng chhe zet leh pawr zet a rawn zai lung lung in a rawn pai lut khut khut a, " Eh... Chaw min lo ei san elaw?? Ka chawmhlawm te hian min zah na in va lo tlachham ta ve.... " a tih zawm zat a, ka lo melh ram ram chu " Lalhriatpui..thleng mi rawn lak rawh " ti hmuk in chair a pawt chhuak sawk a a thu thla nghat dawt. 

A hma a thleng dah in ka nu in chaw a lo khawrh zui a, insiam tur in ka luh san hmak, a hmel ka hmuh reng chuan ka thinrim zual mai mai. Ka kal hlan a ka nu a lo khawih leh ka hlauh avang in muang chang in ka in siam a, a ei kham chuan ngawi reng in a hna kal tur in a chhuak a, keipawh hmanhmawh zet in ka tlan chhuak ve nghal. 

Sawrkar School a kal mah ni ila kan zirtirtu te an fel a, kan class a keimah ang bawk a in lam a lehkha zir tha thei lo ho te chu exam inbuatsaih nan a chawlh kan neih ah pawh school min kal pui in kan zirlai ah an theih tawp in min pui a, vitamin leh damdawi kan mamawh ang te teacher ten pawisa thawh khawm in min lei sak bawk. Hetiang zirtirtu te hnuai a lehkha ka zir thei hi ka vannei ka in ti in an zar hi ni lo se chu ka fail reng ka ring. 

Lehkha thiam thei lo ka ni lo a, a hma chuan First ai hniam ah ka passed ngai lo. Mahse, ka lo puitling chho a rilru hahna chang ka hriat hnu leh kut ka tawrh tak fo chuan ka rilru lam nasa tak in a nghawng a, ka zirna lam ah ka thlahniam rawih rawih a, ka eng tih mah hi a tui thei tak tak tawh lo. 

Class 10 erawh second ah ka pass daih thung a, ka rilru nat zia kha ka la hrereng.Result chhuah ni nileng leh zankhua in ka tap a nih kha. Mi chu an fate Third a an passed pawh an lawm a, an thiantha te sawm in an lawm sak lai a, kei kan exam chhung zawng zan tin rui a buaina siam ka pa chuan min hlap ta zek a, ngaihzawng neih avang a lehkha zir tha peih lo ah min chhuah ta hleuh mai ani. 

School ka thlen chuan kan class zawn a Sir Kenny-a lo vei thauh thauh chu ka hmu a, ani pawn min rawn hmuh rual in a ding zui dat a, thaw hlawp hlawp chung a a bul ka thlen chuan lo nui var var in class a lut vat tur chuan min hrilh a, ka luh rual in Lawmkimi'n ban lo vai in a bul hnai a thu tur chuan min lo au a, hnung lam hawi in a in siam rem nghal sat sat.

Nileng in lehkha kan zir a, min pui tur in subject tin a kan zirtir tu te an in duty chhawk reng bawk. Lunch Break ah chuan Lawmi nen school thlang a theihai hlim ah tiffin kan ei dun a " Mâte, sir Samu-a hian a star che in ka hria " a rawn ti chhuak phawng chu ka melh zui nghek. 

" Awiawmloh em mai, ei mai mai teh " ti zui hlak in a hmarcha rawt pai thlak zet chu ka suak nghal a " A ni alawm...ka hrethiam vek a duhsak bik zia che te hi, vawiin ah pawh khan a en char char che " ka dar a ben pawp pah a a tih chuan " A ninawm sawi tawh suh " vin zet in ka ti a, sawi zui ka duhlo tih a hre ta bawk nen a ngawi zui ve mai bawk.

Kha zan atang khan ka nu chu a tho harh tha peih tawh meuh lo, thil a ei tlem in a nun chu a ngui nghiai reng a, ka theih tawk lah a tlem em em mai si. Ka hmuh phak chin te bawk ka thik lo thei leh ta lo, ka patea chuan a nupui period tai na hlek ah pawh Rasgulla leh a ei theih tur a ngaihtuah sak vat thin a, ka pa ve thung chuan " I thatchhiat vang a nih kha, i tuar te hi a zuau lutuk a " a tih loh leh ka nu na chu awih lo tih hriat zet zet hian a tawngkhum phiar phiar mai zel.

Ka nu ka ngaihtuah bawk si nen, ka pa lah a rui reng a buai loh lai kan nei lo a ni ber. Lehkha zir han tum ve teh mah ila Woofer ah hla ring zet zet in a play a, sawisel lah chu ka ngam der lo. Ka beng hup nghek in ka theihtawp a hai der tum sa teh mah ila, a ngaihna a awm thlawt lo a ni e...

Kan exam a lo hun a, ka pa nun dan erawh a la ngai reng thung. Ka pu in an in a awm rih mai tur a min nawr tak chhen ah chuan lehkha zir tur in ka chho thin a, ka nu ka hruai tel zel bawk. Ka awm loh lai a kut a lo thlak leh ka hlau ani. Ka lehkha zir zawh ah kan haw mai a, chutah chuan ka pa zurui pawh a lo chatthla fel leh diam thin tawh avangin ka zir rei lui ve deuh bawk.

Ka patea te nupa hi an fel a, min duat ka tih tawh kha. Ka ei tur chhang leh Rasgulla tih ang reng hi nitin min lei sak a, ka pi in bawnghnute min lak sak bawk. A hma a ka lo awh ruk ve thin em em..ka thian ten an nu leh pa te'n a an lehkha zir lai a ei tur an lei sak an rawn status thin te kha ka hrechhuak rum rum mai. Ka nu lah chu a ni tel in a chak lo zual zel a, khum a bet ti tih der tawh. 

Tichuan exam pawh tluang tak in ka zo a, exam zawh a class zin ho an rawt erawh ka tel ve theih loh tur thu ka sawi a, ka classmate ten kal ve tur a min sawm sap sap lai in Lawmi pawh in a kal theih dawn bik loh thu a sawi a, keimah vang a kal loh a tum ve ringawt chu ka in thiam lo hle, min ngaihtuah vang a ni tih ka hre ve kar tho sia. Min ngaihtuah lo a kal tur a ka tih pawh in " Nangmah vang a nilo , ka pa te nen zin kan tum alawm " a ti tlat. An zin hun tur hre lo ah min ngai em mawni?

Tlai ka haw chuan ka nu lo mu bâm leh rizai sin hlun chung a lo khur chiam ka hmuh chuan pan hnai rawk rawk in " Nu...ngatinge a? " a pang dek kual dan dan chung in ka ti a, a kal na a chhuak leh tawh tih chu ka hre mai. Damdawi in kal ang ka tih lah in awmzia a awm loh thu a lo sawi a, pawisa khawl chu sawi loh cheng za nga pawh kawl lai kan nei lo tih leh ka pu te tih buai a hreh tawh takzet vang tih ka hria, chung te chuan ka pa ka huat na a belhchhah tawlh tawlh. Mi pa te ang ni ve se la chu hetiang em em hian kan rethei lo ang a, ka nu pawh in heti em em a a tawrh hi a ngai lo tur. 

Ka pu te hian min ngaihtuah viau mah sum leh pai kher ah hi chuan ka pa vang in an in seng ral tep tawh tih theih a ni a, tih buai loh hram hram hi kan nufa duh dan ani. Ka patea hi zirtirtu a ni a, ka nutei'n eichawp dawr lian vak lo a nei bawk a chu chu an eizawnna a ni ve mai bawk si. Ka patea fate pathum school an kal ve tawh a, an hautak lai tak a lo ni bawk nen, rilru a van hah tak...

" Nu... apu te ka call ang aw.. pawisa an nei ang " ka ti ta tawp a, ka beidawng ve em ani. Tun tum a na hi chu hlauhthawn namen lo in ka hlauthawng. " A ngai lo ka dam leh mai ang, kha lai ah khan spasmolar a awm " ti in bangrel a kawk a, ka ei tir hnu ah pawn ah chhuak in van lam ka thlir vang vang a " Lalpa, engtik ah nge ka nu hi a dam dawn? I khawngaih ve lo ami ? " ka rilru in Pathian ka zawt zui mawlh mawlh a, ka mittui tling pam in ka hnar a rawn thip nghal vat vat bawk.Pathian hian ti dam vat se hlim tak in awm ve tawh ila tih hi ka duh ber ani. 

Ka phone phawrh in ka pu number ka dial a a la la har em em mai lehnghal. Vawi hnih ka call na ah a rawn chhang  a " Bawihpui... " a rawn ti dam thluam a, ka pu aw ka hria chu ka mittui a tla nghal ringawt. Ka nu hian a nu leh pa te hnen a hetiang vel sawi a duh loh avang in keipawh min khap tlat a, mahse ka hlauthawnna chuan a thu min zawm tir thei lo ani.

" A call sual em mawnle ?? " a tih tak ah chuan " Pu.. " ka tap chhuak hawk a " I tap elaw? " a ri nghal hluai a chutah phone chu ri rawk rawk in " Bawihpui, ngatinge i tah ? " ka pi aw in mangan hmel zet a a rawn tih chuan ka tawng thei lo, ka tap uar sauh a ka in hnit hlawp hlawp tawh. 

Ka pi chuan ka tah chhan min zawt mawlh mawlh reng a rei deuh fe chhan pawh chhang thei lo a ka in hnit hlawp hlawp hnu ah " Anu hi a dam lo a " ka ti chhuak thei hram. Ka pi in " A na viau em? A kal na a chhuak leh ami ? " mangang tih hriat zet a a rawn tih chuan " Aw... a khua a sik nasa bawk sia, thawh pawh a tho peih lo " ka ti a. Zanin la la hian rawn kal thei se ka tih zia chu pui tak ani.

" I pa a awm em? ka lo bia ang " ka pu in a rawn tih chuan ka kut ka hum ruh nghal teuh a " Awm lo, awm pawh ni se awmzia a awm chuang lo a ngaihsak tak tak hleinem " ka ti zui khawl a, ka nu in phallo mah se ka zep peih tawh bik lo he in hi chhuah san a amah chawp a theihnghilh hmak hi ka duh. Ka pi leh pu bulah chuan ka pa khawsak dan vel chu ka sawi zui mawlh mawlh a.

" Bawihpui, naktuk zingkar ah kan lo kal dawn nia aw..tunah chuan a tlai tawh sia i pu mit tha lo nen zan tlan chu... " a tih lai in " Aih, tunah lo kal ru " ka lo ti a, an ngawi zui vang vang mai.

" Lalsangzuala mai mai chu ka that khawp ang " ka pu aw thum bul bul chu ka hre pha vuai vuai. Mak deuh mai in ka hahdam deuh huai in ka hria...Nge ni a Hmangaihtu  aw ka chhuak chuan min hnem ta pawh ka hre lo mahse beiseina lian tak ka nei chu chu Pathian hian min zalen tir ve tawh dawn tih hi.

" Lo insum rih teh " ti a ka pi in a khak zui hlak lai in " Insiam rawh tunah kan kal ang. Marema kha phone la tunah rawn kal nghal rawh se " a ti zui nghut nghut a. Keimah zawk chuan phone chu off in ka nu mutna lam pan in ka kal nghal a. Ka pu in a ti tawh a nih chuan an rawn kal ngei dawn tih ka chiang.