ZOREMTLUANGA CH ~ 2

" Nu... apu te an lo kal dawn " ka phur na chu ka aw ah a lang chhuak hial a, a lo lawm ka rin tehlul nen chutiang chuan a awm pawn ka hrelo. " Nu.. " ka ti leh a a in hnit fap chuan a tap tih ka hria, a sam ah chul in han sawi em em tur erawh ka hre hauh lo.

Pen thawm ka hriat pawh chu ka ngaihsak teh chiam lo, kawngka inhawng ri ka hriat rual a hmeichhe nui kar kar thawm ka hriat erawh chuan awm a ti nuam ta chiah lo a. " Tun ang hun ah tu tak chu lo kal ni maw? " ti rilru chung in room atangin ka chhuak a, ka thil va hmuh avang chuan ka ding khawng reng ringawt.

Ka pa rui zet leh a bul a hmeichhe thu chu rem lo zet hian an lo in fawp a, ka chau hnawk thei, ka rin phak bak thil ani. Ka lo en reng a rawn hmuh chuan ka pa chu rang zet in a in siam rem thuai a, ka ten zia chu pui tak a ni ringawt.

" Bawih...te.. hei i nu Mami hi i nu kan tur in a lo kal a " ban deuh chap hian a rawn ti a, ka lo ner khum sawk thung. An khawsak dan kha hmulo leh hre lo ah min ngai em maw ni?

" Dam lo kan i tum tlai hle mai " ka pa damdawiin awm lai a a khum bul a awm ve rawn awmpui thin tu nuthlawi ngo vuah Nu Mami chu chiang fahran a melh ran chung in ka ti ve nghat a, a inthlahrung ve deuh nge mawni en pawh min en let ngam lo. Ni e, zak rawh se mi pâ lo kawp duh hmeichhia hi ka zah der peih bik miah lo.

" Nia... khawkar kawng ah ka scooty ke a chhe leh sia rin ai in ka rawn thlen har phah " a ti deuh duai a a tarmit keh sawk khawp a ben hrep mai chu ka chak ber ani.

" Lalhriatpui " seh chilh nawk a rawn ti tu ka pa chu ka melh hrawk a, ka pa a nih na ang a hmangaihna chhete ka la neih ve chang chang pawh amah ngei hian a ti chhe zo ta vek. Hetiang mihring fanu ni tur a ka lo piang ve kher kher hi chu pawi ka va han ti vawng vawng tak.

Room ah ka luh san ta daih a, ka nu mu kawm chal chu ka han en thin. Ka va han lainat tak. Kutthlak a, hrehawm tinreng a tuar tir lai leh natna tuar a a mut lai pawh in a pasal chuan hmeichhe dang a pawm san chu a ni sia..

" Nu..." a bulah mu thla in puan ka siam rem zui mawlh mawlh a " A pu te lo thleng se kan chhuahsan vang vang dawn nia " ka ti zui leh hmarh hmarh a, tawngkam in min chhang lo mahse min hnial ka ring tawh lo. Min hnial pawh ni se ka chhuah pui lui tho tho ang.

A taksa khur(h) dat dat dan ah a tap tih ka hria, heti hian ngawi reng in tuar lo se, ka bulah hian a rilru natna te, a ipik na te hi inbun ruak ve se, lo hnem theih ka chak takzet. A tawrh hi a na em mai a, keichuan a nat zia ka va hriat pui kher lo ang mahse, a fanu hian kuah a, hnem theih ka chak zia hi hria se la ka ti. A ni lah chu han biak vak chi ni in ka hre bawk si lo.

" Nu... i tah duh chuan ka lo kuah ang che.. " ka ti ta thlawt a, zawi muangin ka lam hawi in a rawn in let a, ka lo pui nghal vat a tan han chet mai pawh chu a harsa tawh. " Ngatinge i ngawih reng? Nu leh Pa neilo pawh i ni lo a " ka ti zui niah niah a a ni erawh a ngawi reng thung.

" Heti chung hian i thutiam bawk kha i la ngaipawimawh ber dawn ami? " ka in ngaihtuah thinrim leh tan der a. Kha thutiam tei vet vang a a tawrhna hian min ti alh pup lo chauh tawh.

" Thutiam satliah a ni hleinem, mihring lak a thutiam a ni lo a, engkim chung a roreltu leh ropui ber Pathian lak a thutiam a nih kha. Khatin tawng mai mai suh " a la ti te chuan ka kawchhung a ti sa vek thei. Heti khawp a a lak a a thutiam bawhchhiat hlau ka nu khawngaihthlak tak hi a tan malsawm a, damna pek te hi a har viau em mawni??

Ka nu muthilh hun nghak in ka la meng reng a,a dar ah ka beng thek thek reng a, a muhil ta ni a ka hriat tak ah chuan tho chhuak in sana ka han en chu dar thum a lo ri thuak tawh. Bathroom lut tur in ka chhuak a, ka kal pelh lai a ka mit sir zeuh chuan ka pa leh a ngaihzawngnu thutthleng a inkuah a an lo mu ka hmu chu ka sa nghal pup pup, ka chhuah leh hnu pawh chuan ding meuh in ka en ta reng.

Ka pa tui zet a mu hnâr suk suk chu en in " Eng hian nge maw mawlh che a heti em em a i nun mai le? " ka ti rilru mawlh mawlh. A suahsual chu thuhran, ka nu in a chhiat pui rawp khawp a a enkawl na leh hmangaihna a chhan let dan hi hriatthiam har ka ti em mai.

A dam loh in hmangaih tak in a enkawl a,a vawikhat drip khai pawh cheng sangnga man te a ni a, kan sum neih in a daih ngang si lo. Ka pu te pawisa leh a unau te thawhkhawm a in enkawl kan nih avangin ka nu a inthlahrung thin em em a, ei leh in thleng in a in sum nasa. Kei thleng in ka mamawh tak tak, a lo a ka awm theih loh tih lo chu an hnen sawi lo tur in min khap thin.

Chuti chung chuan ka ni lah khan nitin a call a, ei leh in a insum tur in a hrilh awl lo bawk, ka tha lo nat theih zia kha aw... A hna neih hma zawng a ka nu nu leh pa te an tihbuai nasat em avang in ka nu khan ka pi leh pu te lam chu pawisa a dil duh tawh bik lo hrim hrim a, a luhlul a chhuah lui ve tlat.

Ka pa lah in ei leh in ah ka nu a huphurh em em a, dam loh thinchhiat den chhen in a lakah a sual em em a, tawngkam tha in a be duh ngai lo. A bul a dam lo lo awm pui ve tu tun a a rawn hruai haw tak erawh nui sang leh nelawm zet in a be reng thung a, ka nu thutna lo lam hawi in ka nu awm reng lai pawh in zawi te te in an phun a,an nui dun ham ham zel. Ka nu lo tawrhchhel zia kha aw !!! An khawsak dan chuan chulai a awm ve ho mit a ti kham ngang ni tur ani Putar pakhat awm ve khan a khak ta hial reng a.

Ka thil mitthla let te avang a huatna a khat mit meng ling hlar chung a an mu lai ka en reng lai in " He nu hian kan neih loh eng thil tha nge a neih bik a, kan dawn ngai loh tha tha i pek bik? I hmangaihna, i ngaihsakna leh a bul a i hlim tih hriat tak a i nui hmel te hi ka nu hian a bei ngat ngat chung pawh in a dawng ve ngai lo, he mihring hi chuan i tan engmah a tihsak lo chung che pawh in i pe leh tho si " ka phun chhuak sep sep a, ka nu ka khawngaihna leh nu Mami ka thik lutuk chuan a hrawk zai chakna min pe a, a tur in min tur hial.

Mahse, thaw hrawih hrawih ri a rawn awm a, ka nu mutna lam atang a thawm chu rawn chhuak ani. Rang zet in room ah ka tlan lut a ka nu na tuar lo vial ngal chu a kut ah ka vuan vat a, a bek te chu thlan in a lo bual huh ti tih a, a heh a pet fan fan chuan a na tawk a ni tih a ti chiang, ka va han mangang tak.

Nghet zet a min vuan in a nui lui sak sak a , a mitmeng vai riai te chuan min ti zam chhe zo vek a, ka hlauthawng in ka khur zui dawt dawt mai. " Nu... i tha em? " tap chung in a hmai leh a lu te chu ka han dawm chhawk leh thin. Ka chiai lutuk chu awm ngaihna pawh ka hre lo. Sawi duh tam tak nei hmel a pu a, mahse a chakna te an tlem tawh em a a sawi tur pawh in tha a nei tawh lo a ni ber. Min vawnna a kut chu a zawi hnawk a " Nu.. " ring zet in ka au a, ka sawi nghal nawk nawk.

" Aih...a theih loh. Min kalsan theilo, i tello in ka awm thei hleinem " thawk tir leh tum in a awm ah ka nem zui a, ka tha te chu an khur zo tawh.

Ka pa te pawh ka thawm a nat tak em avang chuan an harh a ni ngei ang, room ah chuan an rawn lut a. Ka nu awm a ka lo nem tauh tauh lai chu min rawn vuan in " A thi tawh " a ti hniam ruih a, tuar ve tak tak te pawh a ang dawn alawm mawle..Takzet hian !!!

Thinrim zet in min vawn na chu ka thing thla nawk a ka ding chhuak nghal hluai , rum lutuk in ka melh zui ngar a.

" I rapthlak hle mai, khati khawp a a hmangaih chung che khan i uire san a, i uire na nu i rawn hruai lut bawk. Ka nu hi a taksa nat vang a thi a ni lo nangmah vang a thi a nih hi I THAH A NI. Nang ang mihring hi chu dam ve reng tlak pawh i ni hrep lo, kal rawh, thi rawh, ka nu thih ai hi va thi rawh " a awm pharh hlup a nem sawk sawk in ka au khum tawn tawn a, amah ka hlauh na te chu huatna tawpkhawk in a thlak zo tawh a hlauh na chhete mah ka nei lo.

" Hriathriat... i rilru a na tih ka hria mahse pa te kha tin an ti ngai lo. Eng mi pawh ni se i pa a nihna a bo lo a nia " Tei vet hian henu sek lah hi. Ka thinrim lutuk chu tawng pawh ka tawng thei tawh lo, ka hrawk ah min hnawh tup tup a, ka khur hlawk hlawk a an khum hrep ka duh lai in sawi ber tur pawh ka hre lo.

" I kâ kha ka thui pin i duh loh chuan lo ngawi rawh " ka au tuar a, eng ah mah min ngai lo zet a rawn che chhuak in ka nu rawn hnaih ve a tum chu ka kut lehlam a a sam a tham in ka tham sawn lawp. A va han zaktheilo zo zai tak...

Kkawngka kik thawm a rawn awm a " Mampui " ka pu aw ka hriat rual in " Va hawn rawh " tih leh nam zui ka rual a, ka pa a melh ngai melh a lo ding ngur chu kal pel nghal vawk in ka nu bul ah chuan ka thu a, a hmai ki rût mai te chu ka dawm a, a kut zur tiak leh cher em em si te chu ka han fawp leh ngawt a. Na hi ka van ti tak ka nu rethei reng reng a nun hmang hi a hlim ve tawh na tur ka ngaihtuah mek lai in min kalsan leh daih si.

" Awi... Ka duh lo " ka pi in tap hawm hawm chung a ka nu a kuah lai chu rilru mang duk chung in ka thlir ngawt ngawt a, nute Siami rawn lut in thil a singsa fel mawlh mawlh te chu ka lo thlir mawl tawp.

An phu suau suau nimai in ka hria, tap chuah chuah thawm leh bang thiat thawm nen, ka â zo takngial dawn. Mi an pung chak in kan in te ve tak ah chuan kan leng lo ti tih ta mai reng a, kan buai nak nak chhung pawh a rei ve fu mai. Ka pu in an in lam a lak chhoh mai a sawi lai in " Ka fanu ruang hi ka in ah a thleng ang " ka pu in a lo ti rum ul thung a, chulai a awm ho chu an reh zui nghal thap.

" Tunge a? " Ka bul a ding pi zami tlem a chiang vak lo an tih thin chuan a thiannu chu tawng rin hlauh hmel zet in a zawt sa sa a " Muani pa " pakhat in a lo tih chuan an ngawi zui ve mai.

" Kha chen kha in hmuh phak reng ah heti khawp hian an awm a, in lo en liam mai mai thei amaw? Remlian hetiang hi a ni dawn tih hria ila chu i fapa lak tlak loh zet nei tur hian ka fanu hi ka thlah hauh lo ang " ka pa lam a melh nghal khui a , a hmel chu a dur khup bawk.

" Ekhai.. Sawma insum rih hram hram rawh, i thinrim tih ka hria a awm pawh kan ti in kan zak ngawih ngawih, hei hetiang hi kan boruak a ni a " ka pu in a tih lai in " Nang hian ka fanu hi i fanu a nih na ang a enkawl zui i tiam a ni lawm ni? Hei hi i lo enkawl dan chu maw ni a? " ka pu a puak keh a ni ber.

" Ka fanu ruang hi ka in ka thlen pui dawn a a ngam chuan min lo dan in tum dawn nia. Chuan Nang Lalsangzuala mahni nupui te pawh kham khawp lo kha chu rawn kal ve lo law law ang che. " ti in a chhuak zui vut a. Ka nu ruang pawh a zahawm viau rual in a boral dan run thlak lutuk chuan mawi leh mawi lo pawn min dawn tir thei lo a ni ber.

Ka nu kuang a an dah luh lai te chuan ka en ngawih ngawih reng tawp. Lainat tu a ngah a, hmeichhe ho chuan an tah laih laih reng bawk. An ni ang a lungchhe vankai a tah ve theih ka chak em em lai ka tap thei der lo a,ka hrawk ah eng emaw hian min hnawh tlat mai bawk.

Ka pu rawn let leh chuan mipa lo awm ho hnen ah motor a ka nu kuang hlan pui tur in a ngen a, a thinrim tih pawh hriat loh khawp in a dam leh dup tawh a, ka pa leh a chhungte erawh vawikhat pawh a melh chhin tawh eih lo. " Mampui i thawmhnaw ho khung rawh aw " ka pi in a rawn tih chuan muang chang a tho in kan thawmhnaw bawm neih ve ka nu in thir thingrem a chhawm ka pa zurui in a sah sawi bawi lam chu ka pan a. Ka pi in min rawn zui in a chek zui tlak tlak.

Ka nu nen a kan thawmhnaw te chu ka khung mawlh mawlh a, ka cousin han ti i la ka pa cousin zawk. Mahse, kan in kawm nasa ve a mi bul ah pawh cousin kan nih thu kan sawi mai zel. U Cindy'n min lo khung pui ve bawk. " Mate, lo let tawh miah suh " a ti zui hlak a, midang zawng ai a ka dinhmun hrechiang tu a ni bawk a, he hmun a let tawh lo tur a min duh hi a awm viau e.

Ka pa hlau a ka tlanchhiatna ber te an ni a, an in a zan ka riah tawp chang lah a tam. A pa hi ka pa putea a ni a, an in a ka awm hi chuan min rawn zawng ngam ngai lo. An chhungkua hi chu awm lo se ka nun hi a hrehawm lehzual ngawt in ka ring.

" Ka lo kal ve thei dawn si lo a... thinrim suh aw... chhel tak in awm la, ka nau i nih kha " a tih thin ang tho in a theihtawp chuan min fuih leh rih a, nidang ang chu ni se amah kuah chung hian ka tap zawih zawih ang a, a ni'n min lo kuah in ka pa thlarau a tawng leh mawlh mawlh tawh ngei ang.

Ruang zui tu pawh an tha hnem angreng viau a, khua chu zing dar 8 dawn ah kan thleng a, chawhnu lam ah vuina nei in mi pawh an tam khawp mai. Thenawmte kawt thleng in an khat vek a, ka nu chu a tawp na ni ah pawh a ropui takzet. Nu ropui tak kha a ni miau a.

Ka pi a ke that loh avang in a rawn tel ve lo a, ka pa pawh ka pu thu sawi vang kha nge ni a in thlahrung ve zawk a lang tlem kher mai. Thlalak pui tur zing a a tel ve pawh ka pu in rem a ti lo hial a, mahse engtin tin emaw an lo telh thei hram a nih hmel. Thlalak lai a a rawn thut ve zuai bak chu ka hmu zui miah lo a, a chan tawk a hmu ah ngai in ka ngaihven duh lo hmak.

Ka nu te unau hi pahnih ni in a u mipa erawh a boral na a rei leh tawh a, a nupui pawh ka pu te'n an rem ti lo chung an in lam ah let in pasal a nei ve leh tawh a, an fanu ka pi te'n a an enkawl zui tak Matei chu min kuah rial in a tap hlawp hlawp reng a, ka nu chanchin a hriat chuan a ti lawm hlawl lo. A ni neihchhun, hmangaih em em tu a nu ai pawh a a ngaih zawk kha a ni miau a.

A hma zawng a tap thei miah lo kha ka nu an phum dawn meuh chuan ka baw ve ta nge nge a, ka neihchhun ka hmangaih em em ka nu min kalsan na chu na ka ti a tawrh thiam a har ka ti em em bawk, rawn harh chhuak leh mai tur a ka rin na te chu ka nei thùl. Beiseina lian tak ka la nei fan a Pathian hian mitthi te pawh a ti nung leh thin a ka nu pawh hi a rawn tih dam leh ka ring lui tlat.

" Aih, khatin ti suh u. Nu phum an tum che ania...Nu ka duhlo min kalsan suh" ka au tuarh tuarh a ka nu thlan khur a tlan luh mai tum a ka chet phut lai in Matei'n min lo pawt bet. Ka bul hnai a awm ho chu an phu nghal suau mai bawk.

" Mampui, hey ti khan awm suh " ka beng bul ah tap chung in a au tuar tuar a kei erawh min vawn na atang a tal chhuah ngei tum in ka tang nasa hle. Tu emaw hian nghet zet in min kuah bet tlat a, tal chhuah tum a ka beih ngial pawh in ka hneh ngang lo. Tunge a nih pawh ka hriat loh awm ah chuan bei in ka tap hlawp hlawp a, rei ngial ka tah hnu a ka in thlah dul deuh tak ah chuan tha te hian min thlah tha ve leh mai a.

Kan piah a ka pu ding luah ka hmuh chuan ka ding chawt a ka puan bih phelh nuaih chu nula dang in an lo siam rem nghal sawk sawk.

" Pu... ka nu hi a dam leh dawn alawm zan khat chiah nghak leh ila... aw??? " ka ban lehlam lehlam ah min dawm bet tlat bawk si, ka pu, a mittui hru zauh leh in her nghut ka hmuh chuan ka beiseina zawng zawng an bo zo vek.

" Mampui... i nu hi dam tawh tur in i duh em kha Pathian in a ti dam tawh alawm " Matei'n min rawn kuah thlawp in a tap rawih rawih a, chu thu chuan ka sawi thiam miah si loh hian ka taksa chu a ti danglam nghal vek. Ka hit sung sung a, ka chhungril ipik zet te chu an veng ta hawk in ka hria.

Ka hawi kual ruai a chulai a awm ho zawng chu tap lo pawh ka hmu lo kei erawh ka mittui a hul leh daih tawh thung. Ni e, Pathian in ka nu khawngaihthlak tak kha a ti dam tawh chu chu ka duh a ka dil awl lo, mahse a tih dam dan kawng erawh pawm harsa ka va ti tehreng em.

Leivung a ka nu kuang an chhilh lai chuan thu hnawk in ka melh ngar a, ka hmangaih, ka engkim, ka neihchhun ka nu chu engtik ah mah ka hmuh leh tawh ngai loh tur in lei hnuai thim, thûk tak ah an hnutchhiah ta si. Ruah a lo sur ang a, vawt a tih pawh in puan sin tur pe tur ka awm tawh dawn si lo.

Mi zawng zawng an kal tawh a Matei nen ka nu thlan ah chuan kan la awm reng. " Nu... i dam tawh tiraw? Ka ngai che e... ngatinge i beidawn hma em em a, i dam leh dawn ka tih kha " ka ti sep sep a, a hma ang a rilru fim pawh hmang tha thei lo khawp in ka awm tawh lo.

" Ni... Mampuii chu lo ngaihtuah duh suh tha deuh in ka lo enkawl ang " in la puitling fe a a rawn ti chu ka in rin hma in ka nui chhuak hawk a kei ai in a thla chauh in a upa a, chuti chung chuan a min enkawl ve a tum chu a nia..

Rei ngial ngawi reng a kan din veng veng hnu a " Chho tawh ang aw? " a tih leh tak ah chuan in kai rial in kan kal dun ve hnak hnak a, a tawngkam a dah puitling vel lutuk chu hun dang ni se ka chum awk awk duh tawh ngei ang.

Thui pawh kan kal hman lo Matei thian te'n min rawn pawh in an tawng zui nak nak a, mi nel lo chi ka ni bawk nen min biak na ka chhan bak chu an tawng ka ngaithla a ni mai.

" Mampuii maw i hming? " an zing a mum deuh ber lian ve thulh tho si chuan nui sang in a rawn ti a " Imm " tih zawng in ka lo chhang. " Enge i hming pangngai " a ti leh a " Lalhriatpuii " ka ti veleh mai.

" Kha kha Rum Siama ania kan khaw Sailoa a nih kha " Matei'n a rawn tih chuan a hming a mak hle mai Mizo a ni chiah lo em mawn le? ka lo ti rilru a " Hei Rum hi i hria em XXX RUM hi " a rawn ti leh a zu hming daih a lo sawi chu ni in. Zu a heh viau em mawni?

" Zobuhkem " a lo ti hluk a, an pahnih chuan an in melh nghal ram ram mai. " Chuan kha kha Ramliana ania Sakawr ti in kan ko mai " sang lawr zuah, hang lam pawl lek lek chu kawk zauh in a ti a, a hmel uluk deuh a en chuan sakawr pawh chu a ang tak tak in ka hria. " I middle school kal na a tha vak lo ani maw? " a lo ti a " tha ve tho e.. " ka tih lai in an lo nui tha hlawm a, a ngaihna hre lo zet in ka melh kual hrek hrek ringawt.

" A tha lo tih a chiang reng " lo ti tu chu a melh nghek a "Kha kha Lawmsanga Sawmnga nei tiin i ko mai dawn nia " ti in Palian lam hnar ngul sang vah, sam buk lam hmeltha vei zet chu a kawk leh a, a kut zungtang pahnih ti pir vah in a lo nui sak a, tawi te in ka nuih ve hram. A lerh hmel ka ti... mahse lerh pawh ni se a awm tho, hmeichhe duhzawng tak hmel leh pian a nei tlat a a luck ve thawkhat ang tih chu en mai pawh in a chiang.

" i bul a mi kha Zozawi-a Zothanpuia a nih kha nichin a lo kuah tu che kha " a tih zawm leh zat zat a. Kuah chung a ka tah lai te ka ngaihtuah let a ka zak chem chem mai. Chu pa chuan min lo melh run a, a nui zui sak a, a hmeltha takzet. A nuih zawng a a ha ngho zum vang leh a biang sum chiang vak lo a khuar kalh te chu a inhmeh hliah hliah.

A mitmeng zim lam pawl lek lek ti lang mawi zual tur a a mithmul chhah tap te chu uluk zet in ka thlir a, mit min lo siai zauh chuan harhchhuak thut in ka phu deuh zawk in ka hria. Ka va han zak mai mai tak...

Eng nge maw ka hriat a hetia ka awm ni ? Ka zan mu tha lo lutuk avang hian ka thluak a fim lo a ni ngei ang. Ka awm dan te chu ka lai deuh hû mai. Mipa duh leh ngainat chu ka nei ve tawh ngei alawm, tun a ka awmdan pawh hi eng nge a nih a, a chhan pawh ka chiang.Sir Samua kha ka duh lo bik a ni reng reng lo a, ka hrethiam lo pawh ani hek lo.

Mahse, ka dinhmun ka han thlir a a ni ang chhungkaw pangai tak atanga seilian, a pa lah kohhran upa a ni a, veng khat pa hausa leh mi zah kai em em a ni bawk. Khatiang fa meuh kha chu kei ang zu ngawlvei fa leh hnunglam a mi sawi sep sep thin kha chuan ka cho ngam lo a ni ber. Chuvang chuan a lak ah ka theihtawp in ka in thup a, a mitmei pawh ka haider lui tlat thin mai a ni.

" Panda i ang " Siama a tih khan a rawn ti a, ka hawi buai deuh na in " Biangpuarnu " Zothana khan a rawn tih zawm zat a, nalh zet in a khi zui sak a, ka biang ka dawm vat chu rang zet in ka kut ka dah thla leh lawi a, lai lutuk in ka lo nui tawp.