Dear Daniel CH-1 ( Lalmeijii Hriatpuii )

"ruati i la tho nange... ka rawn leng dawn ania, min rawn hawn vat teh" kawngka chum bur bur chung a siamtei a rawn au lang lang lai chuan "Va han ninawm reuh tak" ti nang nang in ka khum bul a sana chu ka han thlek pah zauh a, dar 10 a lo ri der tawh. Zan lam a movie ka en rei vang a lu na bur chung chuan tho chhuak in, hmanhmawh lo fe hian room atang chuan ka chhuak a, filter bul ah ding leh te te in tui ka in leh phawt. Chutih chhung zawng chuan ka thiannu pawh chu kawngka chum chung in a lo au ve ngar ngar bawk a, a vin nasat tawh dan ah a thin ter tek a chhuak leh tawh tih ka hre mai, hetia ka best friend chhaih kawlh tluk a nuam tih hi ka ngah lo viau bawk .Ka hawn sak rual rual chuan rawn lut rawk in, rum fahran leh mitmeng ling hlar a min melh pah chuan ka lu ah a rawn tuai nghal nawk a, ka nui hmel a hmuh chuan hawi hmak in thutthleng sei ah a bawk thla nghal rawk a. Chutah " Ka chau lutuk " ti hap chung a a thawk zui hle hle avang chuan ka inthiam lo hnuhnawh leh kher mai.

 " Enge i rawn tih dawn? " thutthleng a a bawp sei zet a thluang zar chawi sawn lawp pah chuan ka ti a, ka thu thla ve nghal zat. " Thil hrilh tur che ka nei a, ka rawn riak dawn bawk. Chuan Apa bulah min dil sak a ngai bawk " a ka ang a sawi zawm leh a tum lai chuan kut lo phar in "I bialpa chungchang anih chuan ka hre peih lo" ka lo ti hmanhmawh a,

"ka hrilh lo tawp zawk dawn che mawnle" rum lutuk a min en chung chuan a ti hmuk a, ka lo then khum sak chu ngaitheilo fahran in a hawi sawn hmak. "Anih enge... han sawi la ka lo ngaithla ang " ti in ka va hnaih nghal a, a phone la chhuak in a khawih daih chu ka beng nghal thawr... " Mawhh enge sawi teh " ka tih leh pawh chuan..

"Thingpui in pah in kan sawi dawn nia" a lo ti daih a, he nu tak hi chu... hetia thil hre chak deuh a mi siam a sawi du leh tlat loh a hrat lutuk hi chu ka ngei thin....

" sawi vat mai rawh " ka tih leh pawh chuan "Thingpui chu va lum vat teh ka riltam teh mai nia,inkhawm kal hma a rawn thlen ka duh vangin chaw pawh ka la ei lo hetah ka ei ve nghal mai ang" a tih tak tlat avang chuan ka va lum ta nge nge a, no lian zet zet pahnih khat pam a ka siam chu chawi phei in, no lo ban pah chuan  "u Sangtea'n naktuk atang rawn kal rawh se a ti" nui var var pah chuan a ti a

"A ni maw...i van sawi har ve" ti chung a ka kuah nawk nawk chu duhlo in a lo tal ve nasa mai. Ka lawm lutuk chu sawi ngaihna pawh a awm lo zawk. " mate fb ah i lar rap ania aw " chimawm zet a a mit ko san zeuh in a nui sawng a, " i ninawm ka ngaihtuah peihlo " ka lo ti let zek thung. Ni e, tunlai social media chak zet avang hian ni thum liam ta mai a ka restaurant thawhna a kan customer nen kan insual kha a lar vak tak alawm, thenkhat in engmah thu chiang hre hawt silo in min dem luai luai a, thenkhat lah in minlo tan bawk. Mahse kei chuan engah mah ka ngailo thung. Mi te chuan eng pawh lo sawi se pawi ka ti lo. Ka dikna ka hria a, khalai a awm ve te khan an hmu bawk a, bakah a lawmman ah ka kek nek bawk a chu chu a tawk ka tih mai lai in, kha nu kha kan minister tu ber emaw fanu a lo nia, ka hnathawhna atang a ban ka tawh phah ta bawk si chulai kar ah ka thawh chi hna lah chu a vang phian mai bawk a... rilru tawt ru zet a ka awm mek lai leh ka mangan ruk em em lai a u Sangtea thu rawn ken tir chuan min ti dam sawng sawng hial in ka hria

" rawng ka bawl lawk loh ni berkher a chaw ei i rawn tu ziah hi chuh... " ti ka tho a, ka choka zim ve angreng tak lam pan chuan phur zet in ka kal phei a " phun phun lo khan va ti mai mai teh, ka rawn ei duhlo tawp tur asin lawm hle rawh " a rawn tih let zek na chu chhang tawh lo in ka nuih liam tawp ringawt. 

Chaw kan ei kham leh meuh chuan tih tur dang vak awm tawh hek lo, in be lem lo in thutthleng sei pakhat ah chuan kei ka mu a tv ka en a, Siamtei chu thuttleng pakhat ah mu ve bawk in a phone en chuan a nui leh kar kar thin. " Ui.. engtin nge niang apa in minlo call " hlauhthawn hmel zet a a rawn tih chuan " Aw... la mai la, khatia thil sual ti awm fahran a phawk chiam kher " ka lo ti zat chu " Ka inkhawm peihlo ka damlo der alawm, hetah ka lo kal leh daih sia, engtin nge ka tih dawn?? kha nangman be rawh " tih leh phone rawn theh a rual a, " Ka duh biklo, enge dawt i sawi tuar rawh " ti chung in ka theh let leh thung.

Kan in hnawn kual chhung in a phone ri pawh chu a lo tawp ve mai bawk a, rum zet a min rawn melh in " Min hau se i ti ami? I rilru hah tal vel ka khawngaih vang che in khang thu te hrilh tur che khan ka damlo der a, mahse nang ve chuhh "  ti nghat in a hawi tum zui deuh bar a, a la ngawi hmak zui. a inkhawm peih loh zia ka hrechiang, kha thil min hrilh a duh vang a dam lo der ani lo tih ka chiang bawk, a chhuanlam mai mai a ni. Mahse ka tan engllai pawh a tha leh he khawvel a min hmangaih tak tak tu awmchhun ani miau bawk si,rilru nuam lo deuh a min siam hi chu a thiam ve ngawt mai. Siamtei titau puan a in khuh hlun chu thlek vang vang in a phone chu ka ban pah nghal zat a, a phone screen rawn en rual a Ramhuai zai ni awm khawp a teng chher chhuai rawn zai thut chuan min thlawh tir lo chauh. Siamtei ti dak a puan kar atang a rawn dak chu melh nghek in phone chu ka ban tau sawk a, ka thinphu hi a la pangngai lo reng reng.

" Hello.. Pa Buat " ka khur deuh in ka hria, " Awh... Ruatruat..matei a lo kal elaw??? ka damlo a tia hei inah  a lo awm silo a, call a chhang thei bawk silo a " dam dap hian a rawn ti a, ka thiannu min rawn melh kawr chu ka then khum nek. " Nia... ka nuam vaklo ka tia a rawn kal a " tiin dawt ka sawi ringawt. " Riah kha sawi rawh " a la rawn ti sa sa chu chum awk mai ka duh tawh. Ka nat dan vel te min zawt leh luam a, sawi ber tu hre hek lo ka rilru a awm ang ang chu ka sawi tawp ringawta, ka nat hmel ngawt in ka ring. U Sangtea thusawi te chu min hrilh ve leh in in enkawl tha tur chuan min chah nghal zat bawk a, chunglai a " Sawi tawh rawh " mi lo ti sek erawh ka melh rum tha thei khawp mai.

Phone dah mai a tum tak ah chuan " ihh... Pa Buat Siamtei hi minlo riah pui se pawi in ti emmm??? Zingah hma deuh in kan lo phei ang " ka ti niah niah a, dik tak chuan ka inthlahrung lutuk. Sual in kawlhrawng ve viau mah ila, pa Buata kher hi chu ka zah in dawt vawikhatmah ka la hrilh ngailo a, a nuam hi ka ti thlawt lo alawm. " Pawi ti lo e.. mahse tha deuh in awm ula, buaina siam loh in tum dawn nia, engemaw harsatna in neih chuan min rawn hrilh vat ula " a tih tak ah chuan ka tang teuh pawh ka thaw huai mai.

Siamtei nen hian kan nu te an in kawm ngeih avang in naupan tet atang a in kawp chho ngar ngar kan ni a,min riah pui zeuh zeuh thin.Ka nu leh pa ten min boral san hma avangin kum 20 ka pum awr ang tih ah keimah a ka awm a ngai a,ani erawh chhungkaw hausa tawk tak a an fanu neihchhun a ni.Lehkhazir mi anih thlawt loh avang a college pawh zo peih lo anih laiin kei erawh BA ka passed hnu ah pawisa ka nei lo nen keimah ka in chawm a ngai bawk sia, ka zir zawm lo thung.

ka nu hian kum 17 ka nih in kal ná avangin min boral san a, a thih hnu kum thum na ah ka pa in a zu in luat tuar lo in min boral san ve leh a,chuta tang chuan keimah in harsa tak in ka khawsa chho ve a,ka pa khan zu ngawl a vei tlat avangin kan neih ve ang ang Ram leh kan in thleng in a ti ral a,a in enkawl na ah kan seng fai leh deuh vek bawk.Siamtei pa in an bul a cheng tur a min sawmna kha chak viau mah ila an ni lo va fin ve ringawt kha ka inthlahrung ve bawk si a. Ka nghei bik lo ang tiin ka in fuih ve tlat a, bakah puitlin zirna a nimai ti in mahni in ka khawsa lui ve ani.

Siamtei hi an hausa ka tih tawh kha a pa hian keh thei dawm tak meuh in a dawm a a duat bawk a, kei thleng hian min duat mah mah zawk. An fanu neih ang neih loh ka neih bik lo hian ka lak a an chhungkaw that zia a ti chiang viau. Zin se Siamtei an hawn ang apiang min hawn a, ka inchhung bungrua thleng in min ngaihtuah sak em em vek. Min duat leh ka lak a an tha lutuk hi fahrah ka nih theihnghilh thak chang ka nei fo mai.

" U Sangtea dawr a i thawh chuan keipawh ka thawk ve ang " a rawn ti chu melh zawk in " Nuam awm " ka lo ti hluai a. chutah nui var var in " Kum hnih vel experience ah kan thawk ang a, apa bulah dawr min hawn sak tur in kan ti dawn nia " phur zet a thut that sauh sauh pah hian a rawn ti leh a. aw,,, a tan hi chuan khawvel hi a va nuam tak...engmah ngaihtuah hah a ngai ve silo.  " Imm... mahse fing deuh in awm la, sumdawnna a hlawk tur chuan fin thiam a ngai ania, i zir theih ang ang zir i tum dawn nia " ka tive ngial tak na a " I awm alawm khatiang ah chuan " a lo ti let daih chu ka nuih tawp. Tih ngaihna a awm thlawt lo... 

Kan helhhawlh ani ber mai,kan pahnih a hna thawh dun vel chu hman atanga kan dream fo anih vang nge kan phur lutuk chu awm ngaihna pawh kan hrelo. Class 10 kan zir lai atang tawh in eng dawr emaw, lian tak in siam tawm kha kan goal a ni hrim hrim a, chung vel suangtuah kir leh a eng a mah hma a inhnial fiam vel chung chuan nileng hun chu kan hmang zo ve leh mai bawk a.

Zan mut hmun ah pawh chuan eng eng emaw sawi in kan la titi tui dun khawp mai. A bialpa chanchin ah bawk kan lut leh a nizan ah an in hau leh tawh hi a lo nia, a bialpa lah hi ka ei lo in amah hrim hrim hi ka ngaina lo bawk nen, then daih se ka ti khawp mai.

" a hahthlak in ingeih lo bawk si, then daih mai rawh. Naupang te in zu ngawl a vei nghal ringawt a, hetiang chuan hma hun a eng lo em mai. I pa ang hi zawng rawh ka tih kha, Samuela te ang nen chuan e...nitin hremhmun a awm i ni mai. Keichu Zu chauh lo pawh hi a khawih tel ka ring tawh " ka ti zui chiam a, zu ngawlvei chen pui hrehawm zia ka hrechiang bawk a, a lo in ruk tir mai ka hlauh vang a ni pakhat bawk ang chu.

"Nia,then daih hi ka duh thin a mahse ka then theilo alawm minlo biak chuan ka chhang lo thei thin lo a" a ti neuh neuh chu ka khawngaih ve takzet,a tang laklawh ve bawk sia.He pa lah hi a phakar si ka thiannu hian a hrethiam lo nge a hre duhlo zawk ni keichuan hetiang mipa hmeichhia te neih ei tum ran ho hi ka ngaina lo a,ka ngai nep hle bawk. a bikin Samuela ang hi , mipa ve si thatchhe lutuk mahni mamawh pawh thawkchhuak peihlo, inla changkang ve satliah tawp , chhungte thawhchhuah sa a bike chhuakthar apiang neih tum ang hian ka thiannu leh hmeichhe dang pawh hi a phu thlawt lo ka ti ve ngawih ngawih.

" Aw... block la i be lo thei a ni mai, in ngaihtuah chiang rawh. Innei ta ula ani ang thatchhe lutuk hian i nu leh pa, u Sangtea te'n rim tak a a thawhchhuah sa a chen hem hem dawn ania, tun atang pawh in ei dan phet che a nih hi a zawn, i aa leh lutuk mai, khawi block nghal rawh " ti chung chuan ka melh zui kal a, a pa hian a ro hmun thum a then a hmun hnih hi Siamtei hming in a dah tih Samuela hian khawi khawi emaw atangin a lo hre bawk nen Siamtei'n then a tum leh a khawngaih theih dan tur ang ber a chet lak a hrat in, chu chuan ani min ngei tir em em ni. Ka thiannu lah hian a duh hneh ve mai bawk si nen, a tawp ah chuan a ngaidam leh nge nge thin a, inneih pui a  a sawmna erawh a la hnial ve tang tang thung. 

" a la puitling lo em a...fapa mal a ni bawk nen duat rawn a ni bawk sia, a la puitling ve mai ang " a rawn ti chhuak sep a, ka ngaihdan ni lo viau mahse engmah ka sawi zawm tawh lo " Mu tawh mai ang aw?? first day atang a kan tlai chuan a chi loh ang " ka tih tak ah chuan " ka mutchhuak lutuk, nizanah ka tlaivar a, muttui aw " ti in a ham zui bai bai a.

Siamtei te in a chaw kan ei dawn vang in hma tak ah ka tho chhuak a, ka inbual zo ka chhuah chuan Siamtei pawh a lo tho chhuak tawh. A scooty a in phur in an in lamah kan in khalh chhuak a, tlan pah te chuan ka phur dun bawk a, kan ri phei le lu mai. An in a insawm tawh mai tur te chuan min sawm leh rih a. Chu em erawh ka inthlahrung ve tlat thung. 

"Kan lo thleng aw " Siamtei au lang lang chu " Mate, choka ah ka awm " ti ri in a rawn chhawn a, choka lamah chuan phei in min lo hmuh veleh " Ruatruat i va vang ve,i inti nula ve deuh tawh in ka hria mi pawh hi i tlawh tha duh tawh lo " nuivar var in nu Muani'n a lo ti a, " Nia... buaina neuh neuh ka nei ve reng a " ka lo ti tha ve mai a, " han in ti fai ula chaw kan ei dawn nia, mi te hi rawn tlawh ve fo tawh rawh, heta awm tur a kan tih che lah in i hnial ve tlat bawk si, ngaihtuah hi i na thin em mai, i u sangtea dawr a in thawh phei chuan hetah rawn awm tawh la a tha ang " a ti zui leh duah a, chhang zui lo in ka lo nui ringawt. An bul a awm tur a min sawm apiang a lo hnial ziah pawh hi a hrehawm zo zai tawh a, han fin ve ringawt lah hi ka inthlahrung ve tlat bawk si.

" Ngati maw i thawhna hmasa chu ??" apple vel sa dawhkan a rawn chhawp pah a a tih zawm leh chuan " Dawr kha an sa tha dawn a " ka lo ti a, gas a a chawhmeh chhuan lai chu chawk rawk rawk in " mate, inchhung chet min pui tur hi kan ngaihtuah ve mai dawn em niang, dawr a i kal daih chuan ka buai dawn em mai " a ti leh a " Ka lo zawng ang, nu kan chho aw " ti a a kal chu ka zui ve nghal a. 

Siamtei in bual lai chuan ka lo insiam zung zung a, a rawn chhuah chuan ka lo insiam zo diam tawh. min en vunng vung in " I van chhelo tak " a ti sap a, " awiawmloh , insiam vat vat rawh kan tlai ang " ti in ka chhuah san daih a, a che sawt lo lutuk avang hian kan tlai phah leh ka hlau. 

Siamtei rawn chhuk ve hnu lawk ah chaw kan ei a, u Sangtea'n kan thawh tur leh kan hlawh tur zat te min hrilh mawlh mawlh bawk a. U Sangtea hi palian ve tak, ngo vuah leh zaidam em em a tih loh chin ah erawh hlauhawm zet a ni a, a tawng tlem ang ai a fiamthu duh leh thian ngah phian si a ni. Amah hi a nginat awm a  ahmeltha em em bawk.

" Nula ti a chhiar tham in ni ve tawh a, midang awm lai a hauh reng te kha in ngai ang e, ka nau te in nih vang ringawt in duhsak bik in ni dawn lo a nia " a ti leh dap dap a. " Artui kan chhum na te kha a la rei loh nen nula in ni ve tawh mai cu ania " nui pah a  arawn ti leh kher erawh ka chaw hmuam lai ka phuh lo chauh. U sangtea hi a hmeltha ka tih tawh kha, ka naupan lai in ka star nasa thei lutuk a, " Ka bialpa " ka ti ve tlat thin a, Pasal a neih ka tum a ni awm e, artui min chhum sak ringawt a ni. Chu chu min chhaih nan hian a hmang fo lehnghal a. 

  

" Tha deuh in awm ula,hnathawk dang te mit ti kham zawng leh thik tur khan va awm reng reng suh u, nang hi chu ka ngaihtuah lo che a matei zawk hi a thin te hi a pan ve angreng sia" nui pat pat a Pa Buata'n a tih chuan ka lo bu nghat a, Siamtei erawh a lo nur nang nang thung. " Ka rual in in kal dawn nia " u Sangtea'n a tih vangin Siamtei'n scooty a keng lo a, dawr lam pan a kan tlan chhung zawng chuan tih tur leh tih loh tur min hrilh kawngtluan a.

Dawr kan thlen chuan u Sangtea'n tawngtaina hmang in, a tawngtai zawh chuan hnathawk dang te hnenah in hmelhriat tir na min nei a, dawr kan hawng zui nghal a, an hming leh veng te sawi pah in Siamtei nen chuan min rawn chibai den den hlawm a, u Sangtea dawr hi dawr lian tak a ni a hnathawk pawh 10 chuang lai an lo awm a, a tam zawk chu mipa an ni. " Puia min ti dawn nia, kan veng a in ang leh nghal a " tih pah a min rawn chibai ve tu chu ka en chuan a lo nui var var a," a nih chu...i thawhna  arei tawh em? "

" Rei vak bik nang,u sangtea leh ka u te hi an in kawm thin a, ka zirlai ka zawm leh hma in ka rawn kal ve zuai a nih hi " a ti a, ka lo bu zauh a " haw rual thin ang aw " a tih leh a chhan ka tum lai mek in " Kan kal rual ziah dawn a, kan haw rual ziah bawk dawn " Siamtei chuan a rawn ti chang fak a, ka va melh nak chuan min lo melh rum nasa mai.

" Den ve " tia Puia kal nulh chu nuam lo ti zet in ka en zui vang vang a , " I van ho thei tak " ka ti chu " I duh leh va kawm rawh " ti hmak in a kal tau zui sawk sawk a, hahthlak hian... " Lo kal teh chhunah ice-cream ka lei ang che "  " I duh leh i thianpa thar kha va lei rawh "  " Nangmah lawm ka lei duh che.." " I lei kha ka ei peih lo, ka mit a uihlit ang "  ka nuih za chu ka insum nasa henu thik thu chhiat dan em em hi chu " Lo kal mai mai teh midang ka kawm peih tak tak lo " tih leh pawh let ka rual a, tum bar chung in min zui ve ta tho.

 Siamtei nen chuan online shopping lam khawih tu ah kan awm a, u Sangtea hian a sumdawnna hi heti lam zawng hian a lo zauh tawh a, a hlawk phah viau in ka ring bawk. Pheikhawk thla lak a, post leh order lak te deliver tur a pek chhuah te chu kan hna ber a ni a, Mizoram mai nilo state dang atanga order, thawn chhuah ngai pawh a awm nual mai. Customer thenkhat dilchhut tak tak leh ze heang hrang te han dawr meuh chu a hahthlak phian. 

Ka rin ai tak in kan hralh thei phian a,mi lut chhuak an awm ve reng vang in midang chuan thut mai mai na hun an awm meuhlo.Lunch kan ei lai chuan ka thiannu chuan chow ei tun pah in a bialpa chu a bia a an inhau leh nge mawni a in sawithiam zat zat mai a ka lo nuih kar kar chu min melh leh nghek thin bawk.

Dar 5 ah midang ho chu an bang a, u sangtea'n min thlah haw nghal a tum vangin midang an haw hnuah pawh Siamtei nen chuan kan la awm a,eng eng emaw sawiin kan nui kar kar a. " ka zung lawk dawn " tia Siamtei a kal hnu lawk ah mi pakhat hi rawn lut in ka lo en reng lai chuan

"Minlo hrethiam la Sangtea hi a awm em" a rawn ti a, " Awm lo... sawtah a kal lawk a,a rei tawhlo ang, i nghah duh chuan lo thu rawh " nui sang chung a ka piah deuh a thutthleng chu kawk in ka ti a, ka en zui kar bawk.

" U Mapui.. " Siamtei rawn tlan phei leh a kuah zui chung chu phawk fe in ka lo en reng a " Enge min lo hawn? " a tih zawm zat a " I va nula tawh ve... live in i hmeltha zawk a nih hi " pakhat chuan a lo ti let a, ka lo hawi lawl lawl ringawt. " Inah ka pe dawn che nia " tih pah in a sam ah a tuai sak a, an nui dun var var chu ka lo melh tawn sek ringawt. 

" ruat.. hei u Mapuia nih hi ka cousin " a tih chuan ka melh zawk a tawi te in ka han nuih a, ani pawh chuan min rawn in in a nui ve suk a " u Mapui hei ka bestfriend Ruatruati nih hi, a hrisello teh mai nia, nakinah damdawi tha deuh chawh rawh aw " a ti zui zat zat a, u Sangtea rawn lut zui in an in chibai nawk nawk a, khua a thim tan tawh bawk nen order ka list te chu a bih thuak thuak hnu ah kan haw ve ta hram.

Siamtei te inah an mikhualpa chu a tlang a, u Sangtea leh Siamtei'n an in lam ah chaw ei ve leh mai tur in min ti na a ka hnial lui ve tlat thung. Mikhual an neih lai lai a lo va tel ve kha ka duh teuh lo mai. Ka in kawt a ka chhuk hnu ah pawh an la tlan chhuak mai lo a, min thlah reng reng in inchhung ka lut tih a chian hnuah chiah u Sangtea hi a tlanchhuak chauh thin. In a ka luh hma in ban ka han vai zauh a Siamtein zaizir a min rawn call tur thu a sawi hnuah ka luh san a, ka inthlak zawh hnuah eirawng bawl in inchhung ka ti fai leh phawt a, chaw ka ei fel meuh chuan dar 8 a ri thuak tawh.

Zanah Siamtei nen inbia in u Mapuia chu pa Buata farnu fa a nih thu te, Doctor a ni a, Champhai atang in Aizawl ah an rawn sawn a an inah chuan a awm rih dawn thu te chu a rawn sawi a. Han sawi pui vak ngaihna ka hriat loh avangin a thusawi engkim chu ka um e liam kual vel mai mai. 

" Ka mu dawn, nangpawh meng rei suh, kan tlai ange " ti in phone ka dah zui a, zan lamah rawng ka bawl lawk avangin zing a ka harh hnu ah pawh rei fe chu tho chhuak lo in ka mu reng a, ka period hnaih tawh vang nge ka zawi viau bawk. Dar 7 rik dawn ah ka tho chhuak chauh a, ka inbual zawh hnu ah insiam leh te te phawt in tukthuan ka bar a, Siamtei a lo thlen meuh chuan dar 9 a ri thuak tawh. Nghah rei hi a ngai thei veng veng ania... 

Dawr kan thlen veleh u Sangtea'n nimin lam a ka list siam te chu deliver tur a pack fel tur in min lo ti nghal a, store room lam ah kal in ka che nghal zung zung a siamtei'n min rawn zui nghal in kan buai dun khawp mai. " Tihsual neilo tur in fimkhur ru aw " u Sangtea'n ti in a au zui lung lung a, ' mi hi ring lo viau zel suh " Siamtei'n ti let ve in kan nui zui ham ham a, kan pack tan tak tak chu kan inbiak chhun pawh " 35 i kawl em? 39 kha hetah hian ka hmu reng sia " tih vel hlir ani.

Order kan pack zawh hnu ah delivery boy in a rawn la a, keini chu kan hna ngai bawk ah kan bur leh ngar ngar " reseller te thawn tur kha lo buaipui rawh aw " U Sangtea'n a rawn tih chuan computer hma ah thu thla in kan buai zawm leh nghal a, ka rin ang ai daih in u Sangtea sumdawnna hi a lian. 

Order te list a ka buai lai chuan thil rimtui zet in ka hnar a rawn verh zar a, ka bul hnai te a u Mapuia lo thu reng ka hmuh chuan ka phu deuh zawk mai, a lo kiai suk a, " I lo awm alaw?? " ka ti ringawt. Lo bu nghat in " I va buai ve, puih i ngai em? " a lo ti let a " Ngailo mai " ka thil tih lai ah chuan ka bur leh nghal chat a, a ni pawn engmah a lo sawi zui bik lem lo. Mahse, a hma ang a rilru zawng zawng pe chung a thawh leh chu ka thei ta hauh lo. A mi uap chu a na in, a rimtui inkah te chuan ka ngaihtuahna an la peng tlat a, ka mitsir leh zeuh thin a, ani erawh a lehkhabu ken lai chu chhiar in thildang ngaihsak hmel pawh a pu lem lo. 

" Thil ei tawh ang u keichu chowmein leh lassi ka duh a, enge in ei ve dawn? " Siamtei chuan ka bul a rawn thut pah in a ti a, " Momo leh lassi aw" a lu a bu zauh a, lehkha them ah chuan a ziak nghal mawlh mawlh a, " u Mapui enge i ei ve dawn ? " a tih leh chuan " A ei ang kha " a lo ti nghut a, " Ehhh " tih pah a min en tawn zak zak in a nui tet tet a, min ti zak alawm le. Ka laih ve ringawt chhan chu ka hre hauh lo a, ani thung chu a awmdan a danglam phah eih pawn a lang lo.

" Engtik ah nge hospital chu i zawm dawn? " ka thiannu in a tih chuan " Karleh zirtawp " a lo ti mai a, " anih chuan tih tur i nei chuanglo a dawr ah lo kal ve ziah rawh aw " a tih leh pawh chuan " Mahna le " tih zawng in a lo chhang, a aw chu a dam dup na a, a tawngkam bung lutuk leh a mitmeng thip zet te chuan an ti nelawm lo zo vek in ka hria, kei phei chuan ka be ngam lo hrim hrim. A chhang tawi thei viau na in ka thiannu chuan a biak chu a thulh phah lem hlei lo a, a rul tawk te bak in a chhang lo na a, a zawhna te chu a chhang ve zel tho a, a lehkhabu ken lai chu a bih pah reng tho bawk.

Chhun thil te kan ei zawh chuan ka thutna ah thu in ka list siam sa te chu a dik em tih vel te endik in customer te zawhna chu ka chhang pah zung zung a, " Ruatruat, Mapuia nen Mission veng ah order hi va dah lawk ru aw, " u Sangtea'n a rawn ti a, ka lo bu nghat a, " Mapui va kal pui lawk mai teh, Sangsanga a chawl a ka chhuak hman bawk silo " a ti leh a " Khawilai tak ah nge pek tur " ka tih chuan " Mission veng biakin thlang ah Mathiangi shoe store tih a lo in tar ang " tiin u Mapuia chu chahbi a pe a.

Pawn ka chhuah chuan motor a lo ti nung tawh a, ka luh rual deuh thaw in a tlan chhuak a, ka luh lai a min lo melh zawk bak chu vawikhat min ngaihsak awm pawn a awmlo a, min be miah lo bawk a,  kei lah chuan ka be hmasa ngam der mai silo. Kan thil pek tur te kan pek fel hnu a kan let leh lamah jam ah kan la tang zui a, kan ngawi dun chawrh chawrh chu hrehawm ru tak ani. 

" Ice-cream i ei duh em? " a rawn ti chuan min ti phu zawk lo chauh, " Maw..e, aw.. duh tho " ka ti bah niah a, min be thut khan min thawng lutuk a ka buai a ni ber. Nui suk in pawisa min pe a " Kha va lei rawh, Vanilla ka duh " ti in kan piah deuh a dawr chu a kawk zauh a, ka chhuak nghal sawk sawk, ka chet phung chu mak ka ti ka hrethiam lo reng reng. Ka lei zawh a ka chhuah chuan faifuk a minlo koh na lamah chuan ka tlan zui dat dat a, pawisa kir leh a ice cream ka pek lai a min lo melh chiang lutuk chuan min ti mur sawng sawng in ka hria, ka beng a sa ham ham a ka kut leh ke hmawr a hik vek bawk. He doctor hi ka hlau ru deuh tlat. Ka kawchhung zawng zawng en tlang vek tum ni awm tak hian min en chiang thei em mai a, awm a ti nuam chiah lo.

" I enge na a? " a rawn ti leh hlawl chu a mak ka ti ngei mai, damlo hmel ka pu em mawni " Ahh na ka neih pawh ka hrelo " ka ti niah niah a tawng pawh ka tawng ring ngam lo, " Matei'n i hrisello a tia " a tih leh tak ah chuan " E.. ka pum hi a na ve zeuh zeuh a chu chu niang " ka ti leh mai a, " Khawilai ah nge a nat ? " a tih leh tak zel ah chuan " Ka thin hnunah hian " " Ulcer a nih chu " a ti leh mai a, engmah a sawi zui tawh lem hlei lo a, dawr kan thleng nghal bawk nen keipawh ka bu nghat ringawt.

Kar tluan in u Mapuia pawh a rawn kal ve ziah a, mahse kan in be khat khawp mai, kan thawh pui hmeichhe ho chuan chhelo an tih thu an sawi leh sap sap thin a, a hmeltha a, a pian a nalh bawk, pa lian tawk tak a ni a, hmeichhe mit a la viau tih lanna chu nula customer kan ngah theih danah hian sawi ngailo in a chiang viau. Kar tawp a ni a, vawiin chu kan ban hma ni a ni bawk nen bazaar ka tum a, naktuk chu inkhawm lo in nileng in ka mu ang tia ka lo ngaihtuah reuh reuh lai in 

" Naktuk ah ka pa in chaw rawn ei rawh se ati" u Sangtea rawn ti a, " Nia, zanah lo riak pah bawk la " siamtei'n a lo tih zawm zat a, ka chhan hma hma in " Zan in pawh lo riak rawh, tiraw U ??  naktuk ah kan inkhawm dun ang a " tiin u Sangtea a melh pah ralh a,a va han phakar ve tak henu vang hian ka plan zawng zawng a flop leh vek dawn " Ni e, lo riak nghal mai rawh " a rawn ti a,hnial chu duh viau mah ila Pa Buata leh u Sangtea thu a ni miau sia, han hnial ngam pawh a ni meuh lo. Ban deuh hian aw chu ka pawh leh ta nge nge a, phur erawh ka phur thlawt lo.

Siamtei te in lam a ka cham rih deuh dawn avangin ka in lamah ka thawmhnaw leh mamawh tur ang te la in kan kawi a, u Sangtea leh u Mapuia chu an in kawm ngeih hmel khawp mai. Eng eng emaw sawi pui in u Sangtea nen chuan an in be reng a, Siamtei'n a phone ringawt min bih san daih sia, keichu ka lo ngawi reng ringawt. 

" He zawng chhe pa hi " phawk lutuk in ka thiannu rawn au thut lam chu ka melh a, min va han ti phu nasa tak, thla chu nei ila ka thlawk chhuak daih hial ang chu, ka awm chhung rawn na zawk in ka thawk a sak nghal talh a, ka awm dawm in hahdam thei ang ber a thaw lak tum in nghenchhan ka ngheng a, ka thaw zui hle hle ringawt " Ui ka duhlo " min rawn en pah a inthiam loh hmel fe hian a ti a, lung chak lo nei ka ni a, hetiang thil thin thawng lutuk ah hian ka thawk a buai thin. Min rawn hnaih nghal ruak in ka kut a rawn hum nghal chawt a, U Sangtea chu a ding dawt a " Ruatruat " rawn ti nghal hluai in a rawn hawi let zawk bawk a " Ka tha " ka lo tih tak ah chuan thawk la hluai in Siamtei chu rum fahran hian a melh zui kawk a, " I thiannu kha lung thalo nei a ni tih i hria a ni lawmni? " a ti zui fawk a, Siamteii inthiamlo leh mangang hmel lutuk bawk si chu khawngaihthlak tak ani. 

Siamtei thutna lam kawngkhar chu rawn in hawng rawk in u Mapuia a rawn lang zat a, " Chhuak teh " ti in Siamtei chu a melh nghal run a, ka mar te rawn dek in " Damdawi ei lai i nei em? " a ti zui a, " Enteh, ka tha vek tawh engmah na ka neilo " ka lo ti chu min va han melh rum chiang tak, ka hmul thi te chu an rawn ding ur ur maiin ka hria. 

" Aw nei.. " ka ti sep a, ka bag ah lai atang chuan ka damdawi ei thin chu phawrh in Siamtei tui minlo pek nen chuan ka ei a, "Sangte kal rawh helai ah tih theih a awmlo " a ti leh nghut a ka bulah chuan thu in u Sangtea chu a tlan chhuak zui thuai a, in kan thlen meuh chuan ka tha vek tawh, a hma pawh a ka awm fo thin dan tho a nia, damdawi ka ei chuan reilote ah ka tha leh mai thin.

 In a kan luh hnuah pawh chuan sawi chhuah leh kher tul ka tih loh tehlul nen u Sangtea chuan thinrim zet in a nu leh pa bulah a sawi leh hram a, Siamtei chu an hauh rawn luih luih a ni ber. " Mate, i thiannu nunna derthawng ah i dah tih i inhria em? " pa Buata'n a tih lai a Siamtei inthiam lo leh mittui tla ka hmuh chuan hrehawm ka tih zia chu pui tak ani. Thil lian tham thleng pawh nilo a chuti tak a Siamtei an hauh phah chu nuam lo ka ti takzet.

" Ih... Engtin mah ka awmlo, hei ka that vek hi a tih luih pawh a nih loh kha.. " ka lo ti vat a Lalsiami lah chu chutia ka chhan tak ah chuan a tap chhuak a, a la tap ring em em zui. U Sangtea thinrim hawi hmak pawh a phuh thawt a kan nui zo ta vek. Siamtei erawh a tap uar tawlh tawlh emaw tih tur in chhuatah a thu a " Ka tih luih pawh a nih loh kha " ti in a khup ah a chal a nghat a a insut zui hliam hliam a, apa in nui chung a " Kan hria e, a tawk tawh, ka hau tawh lo ang che " tih pah a a zuk kuah lai te chuan " Ka inthiam lo ve tho " ti in a la tap tawng zuah zuah zui a, family baby ngang hi a nia a buaithlak ve ani.

A tah ban tak ah chuan chhung inkhawm te nei in tawngtai rualna hun kan hmang a, Inrinni tlai hi chhungkua a tawngtai rualna neih na hun atan a an hman thin a ni a, chaw te kan ei kham hnu ah Pa Buata'n inkhawm loh a phal silo a,peihlo zet in Siamtei nen pawh kan inkhawm leh ta nge nge a, kan muthlu tluan leh parh tho. Inkhawm ban ah u Sangtea'n Carrom Board pen a rawt a, Siamtei nen min tan dun tir leh a, u Mapuia nen an tang ve thung a, kan hlimna tawk chu kan hmu ve leh mai zel.

Pa Buata te nupa Comitee bang rawn haw in an rawn tel ve nghal bawk a, Inrinni zan hi chu u Sangtea pawh a lengchhuak ngailo.An chhungkaw zan ah an hmang a chhungkua a inkawm hlim leh thil tih ho nan an hmang thin. Hei vang hi a nih ka ring an chhungkua an in ngeih em em ni. Nu leh Pa leh an fate hi thian ang mai in an inkawm thei tlat.

Board kan pen zawh ah Siamtei leh u Sangtea te nen kan naupan lai te kan in sawi siak a, sawi leh tawh ngailo se ka tih ber mai kha u Sangtea bawk chuan a rawn sawi leh a nuam hi chu a va han ti tak, Siamtei nen hian naupan lai chanchin kan ngah dun ve bawk a, sawi tur an hre hlawm nasa mai bawk nen  ka ip ru deuh ngar ngar ringawt. Kan tleirawl sual lai vel te an han sawi chu nuih a za duh ngei mai. Kan inkhawm bang in zurui kan sawisak dun an sawi lai a u Mapuia ka va en chuan a lo nui suk suk a, ka zak thar tlat mai lehnghal